Памежны камітэт Беларусі зноў абвінаваціў Літву ў жорсткім абыходжанні з мігрантамі
Як заявіў Памежны камітэт Беларусі, літоўскія памежнікі 28 кастрычніка нібыта пабілі двух мігрантаў з Судану і выдварылі іх назад у Беларусь. Праўда, самі мігранты пра такое не казалі.
На відэа, якое публікуе Памежны камітэт, адзін з мужчынаў распавядае, што «нас пасадзілі ў турму», «забралі нашыя тэлефоны і зламалі», на наступную раніцу адвезлі на мяжу з Беларуссю і адпусцілі, а торбу з грашыма не аддалі.
Памежны камітэт сцвярджае, што мужчынаў білі, але сляды пабояў не паказвае (хоць раней пры падобнай заяве аб гвалце польскіх памежнікаў паказвалі мужчыну з траўмаванай нагой), ды і самі людзі на відэа пра такое не кажуць. Мужчына на відэа хіба паказвае, што ягонага спадарожніка ў нейкі момант перад адпраўкай у турму штурхнулі на зямлю і наставілі на яго зброю.
Літоўскія памежнікі пра такое здарэнне не паведамлялі. Але, паводле звестак Памежнай службы Літвы, 28 кастрычніка з Беларусі не прапусцілі трох мігрантаў, якія спрабавалі трапіць у краіну незаконным шляхам. Днём раней не пусцілі 54 чалавек, двума днямі раней – 72.
Міграцыйны крызіс не спыняецца і на іншых межах Беларусі: у Латвію 28 кастрычніка не прапусцілі 49 чалавек, у Польшчу 28-га – 72, 27-га – 77, 26-га – 72, 25-га – 41, 24-га –120, 23-га – 47.
Людзі паміраюць у Беларусі – вінаватая Латвія
Беларускія памежнікі на гэтым тыдні асабліва часта вінавацяць латвійскіх калегаў у смярцях мігрантаў, памерлых на тэрыторыі Беларусі. Пра аднаго памерлага расказалі 23 кастрычніка, пра яшчэ двух – 24 кастрычніка, яшчэ пра двух – 28 кастрычніка. Акрамя таго, распавялі, што аднаму мігранту-падлетку пагражае ампутацыя ступняў праз абмаражэнне.
Адметна, што ўсе гэтыя смерці, у якіх вінавацяць Латвію, адбыліся на тэрыторыі Беларусі – падобна, у памежнай паласе, якую памежнікі мусілі б рэгулярна патруляваць.
Памежная служба Латвіі 27 кастрычніка публікавала відэа, на якім, як сцвярджаецца, па беларускі бок мяжы група людзей прыносіць пад памежны плот два целы без прыкметаў жыцця і пакідае іх ляжаць.
Міграцыйны крызіс быў штучна створаны рэжымам Аляксандра Лукашэнкі. Крызіс пачаўся ў канцы вясны 2021 года. Адпраўным пунктам стаў скандал з захопам самалёта «Ryanair», які пацягнуў за сабою маштабныя абмежавальныя захады з боку Еўразвязу і ў тым ліку ўвядзенне сектаральных санкцыяў. У гэтай сітуацыі рэжым Лукашэнкі даў зразумець, што разглядае міграцыйнае пытанне ў якасці механізму шантажу Еўразвязу і помсту за санкцыі.
Польскія, літоўскія і латышскія памежнікі неаднаразова дэманстравалі відэа (напрыклад, такое) таго, як іхныя беларускія калегі не толькі не перашкаджаюць парушаць закон, але і спрыяюць пераходу мяжы незаконнымі шляхамі. Журналісты ж не раз даказвалі, што на нелегальнай міграцыі зарабляюць беларускія кампаніі, у тым ліку блізкія да атачэння Лукашэнкі.
Улады Беларусі гэтага не прызнаюць і вінавацяць суседзяў, што тыя не прымаюць у сябе тых, каго ў Беларусі лічаць уцекачамі. Суседнія краіны не лічаць уцекачамі грамадзянаў трэціх краінаў, якія спрабуюць прабіцца ў Еўразвяз з Беларусі, ды Беларусь часцей за ўсё не дае тым людзям статусу ўцекача ці іншай абароны.
Польскія памежнікі нядаўна прыйшлі да высновы, што Расея сталася асноўнаю транзітнаю краінаю для мігрантаў з Усходу, якія кіруюцца праз Беларусь у Польшчу. Такая сітуацыя зрабілася наступствам адмены шэрагу беспасярэдніх рэйсаў з краінаў Блізкага Усходу ў Менск
Міністэрства замежных справаў Беларусі расказвала, што беларускія памежнікі хацелі нейкіх перамоваў з Латвіяй наконт мігрантаў. Чаго хацелі за спыненне міграцыйнага крызісу, не сказалі наўпрост, але згадалі закрыццё Латвіяй аднаго з двух легальных памежных пераходаў на мяжы з Беларуссю.
Алесь Наваборскі belsat.eu
