Міністэрства ўнутраных справаў Беларусі прыняла пастанову аб квотах на прыём хадайніцтваў аб статусе ўцекача, прытулку ці дадатковай абароне на 2023 год.
На 2022 год МУС вызначыла на ўсю Беларусь квоту ў 600 прынятых хадайніцтваў, у 2023 годзе квоту павялічылі да 2500 хадайніцтваў: па 500 на Віцебскую і Гомельскую вобласці, 390 на Магілёўскую, па 380 на Берасцейскую і Гарадзенскую, 350 на Менскую. Прычыну павелічэння квотаў не тлумачылі.
Ды прыём хадайніцтва не значыць наданне статусу ўцекача. Уцякачка з Украіны вясной расказвала «Белсату», што ў Беларусі ёй не было ніякай дапамогі, а вайна ва Украіне не была «важкім аргументам» для рэгістрацыі. Некаторых мігрантаў, якія просяць прытулку ў Беларусі, змяшчаюць у ізалятары часовага ўтрымання да рашэння пра іх статус або высылку.
З 1997 года па першую палову 2021-га (больш новай статыстыкі няма) Беларусь прыняла толькі 9,8 тысячы хадайніцтваў аб статусе ўцекача, прытулку ці дадатковай абароне, за першую палову 2021 года – 209 (з іх 111 – у Украіны, 21 – з Іраку, па 11 – з Конга і Турэччыны, 8 – з Афганістану). Нейкі статус далі 71,8 % заяўнікаў (67,1 % – дадатковую абарону, 4,7 % – статус уцекача).
Беларускія ўлады заяўляюць, што з 24 лютага па 9 снежня 2022 года ў Беларусь прыбыла звыш 69 тысяч грамадзянаў Украіны, пры тым асноўная іх частка нібыта прыехала не наўпрост з Украіны, а з Польшчы, Літвы і Латвіі. У Польшчы гэта называюць «фальсіфікацыяй рэчаіснасці». Беларускія ўлады раней у пытанні ўцекачоў з Украіны падмянялі паняткі: заяўлялі то пра 150 тысяч, то пра 160 тысяч прынятых уцекачоў з Украіны, тады як столькі людзей звярталася за пэўны перыяд па від на жыхарства ў Беларусі, статус уцекача тады далі толькі аднаму ўкраінцу, а яшчэ адной тысячы – «дадатковую абарону».
Алесь Наваборскі belsat.eu