На закрытым 19 верасня памежным пункце Латвіі з Беларуссю былі ўсталяваныя бетонныя ўмацаванні ды расцягнуты калючы дрот.
Фотаздымкі «абноўленага выгляду» латышскага памежнага пункту на мяжы з Беларуссю з’явіліся ў акаўнце Памежнай службы Латвіі.
На здымках бачна, што на дарогу былі выстаўленыя бетонныя блокі ды нацягнуты калючы дрот.
Нагадаем, што ўрад Латвіі 19 верасня пастанавіў закрыць пункт пропуску «Сілэнэ» (з беларускага боку гэта КПП «Урбаны»). Такое рашэнне тлумачыцца захадамі бяспекі і звязанае з міграцыйным крызісам.
Так, паводле ацэнак латышскіх уладаў, за апошні тыдзень спынілі 894 парушальнікі, агулам у верасні – 1773, а ў жніўні было 1615 спробаў незаконнага мінання мяжы.
У сярэднім за содні праз пункт «Сілэнэ» мяжу пераходзілі 625 асобаў, а таксама 90 легкавікоў і грузавікоў.
Такім чынам, на гэты час у Латвіі з Беларуссю застаецца толькі адзін пункт: «Патэрніекі – Грыгараўшчына».
Нагадаем, што 18 жніўня Літва закрыла памежныя пераходы «Шумскас» (з беларускага боку – «Лоша») і «Твярачус» (з беларускага боку – «Відзы»), а яшчэ раней – грузавы чыгуначны пункт «Стасілы – Беняконі». Усяго на мяжы з Еўразвязам цяпер працуе толькі 6 пераходаў.
Раман Шавель belsat.eu