Выдавец Андрэй Янушкевіч паведаміў на сваёй старонцы ў Facebook, што перадасць усе грошы з прададзеных сёння (29 ліпеня) кніг выдавецтва «Янушкевіч» на рахунак марафону салідарнасці «Нам не ўсё адно!».
Кнігі выдавецтва на беларускай мове можна набыць праз спасылку. Сярод іх творы такіх пісьменнікаў, як Альгерд Бахарэвіч і Аляксандр Чарнуха, пераклады Джорджа Оруэла, Эрнэста Хэмінгуэя, «Гары Потэр» Джаўэн Роўлінг і кнігі іншых аўтараў.
Падчас онлайн-марафону «Нам не ўсё адно!» на 15:30 гледачы сабралі 180 000 еўраў. Заданаціць на беларускіх палітзняволеных і іхныя сем’і можна тут: salidarnasc.com. У той жа час арганізатары марафону просяць жыхароў Беларусі дзеля ўласнай бяспекі не рэпосціць, не лайкаць і не каментаваць трансляцыі з персанальных акаўнтаў ды ахвяраваць грошы толькі праз карткі і рахункі сяброў і блізкіх, якія жывуць за мяжой.
Да марафону далучыліся больш за 20 беларускіх незалежных медыяў, у тым ліку і «Белсат». Марафон працягнецца да 22:00 менскага часу. Спасылка на данаты будзе дзейнічаць да канца дня 30 ліпеня.
Алена Рувіна belsat.eu