У сеціве з'явілася відэа, на якім палоннаму ўкраінцу адразаюць геніталіі. Ва Украіне заявілі аб ваенным злачынстве
Увечары 28 ліпеня ў некалькіх тэлеграм-каналах з’явілася відэа, на якім, як мяркуецца, расейскія вайскоўцы канцылярскім нажом адразаюць геніталіі ўкраінскаму палоннаму.
На кадрах відаць, як звязанаму чалавеку ў ваеннай форме канцылярскім нажом адразаюць машонку. Палонны спрабуе супраціўляцца, але яго адпраўляюць у накаўт ударам нагі ў патыліцу. Мы не публікуем відэа з этычных меркаванняў.
Як паведамляе «Вот Так», чалавека з нажом некаторыя тэлеграм-каналы ідэнтыфікавалі як удзельніка аднаго з сюжэтаў на федэральнай ТБ: у ім яго прадставілі як байца чачэнскага добраахвотніцкага батальёну «Ахмат». Тады расейскае тэлебачанне расказвала пра «зачыстку» паўночнаданецкага заводу «Азот».
На відэа, якое распаўсюджваецца ў сеціве, ужо адрэагавалі пракрамлёўскія тэлеграм-каналы, яго посціць расейскі прапагандыст Уладзімір Салаўёў. Яны сумняваюцца ў сапраўднасці відэа і цікавяцца, чаму на відэа няма фантанаў крыві, а палоннік не выдае гучных крыкаў. Ваенкар Кацёнак (блогер Андрэй Марозаў) сцвярджае, што «ад самога відэа за вярсту разіць пастаноўкай». Аднак у пачатку аднаго з апублікаваных урыўкаў відаць, што палоннаму ўстаўляюць у рот кляп. Менавіта гэта заглушыла крыкі ахвяры.
Іншыя тэлеграм-каналы факт ваеннага злачынства адмаўляць не сталі. Напрыклад, канал ДШРГ «Русич» заяўляе, што «калі адзін з [расейскіх салдат] прыняў рашэнне пакараць шляхам кастрацыі байца ЗСУ, значыць у яго былі на тое страшэнна важкія прычыны» (пунктуацыя захавана). Адзін з байцоў «Русіча», які заве сябе Яўген Тапаз, піша: «Я ж казаў што вас будуць кастрыраваць» (пунктуацыя захавана). Тапаз сцвярджае, што гэта відэа апублікавана ў адказ на катаванні расейскіх ваеннапалонных украінскімі салдатамі. Пра якія менавіта падзеі ідзе гаворка, ён не ўдакладняе.
На наступны дзень, 29 ліпеня, з’явілася інфармацыя аб тым, што здарылася пасля з чалавекам, якому на відэазапісе адрэзалі геніталіі. Украінскія тэлеграм-каналы сцвярджаюць, што палоннага расейскія вайскоўцы спачатку застрэлілі, а затым працягнулі па зямлі, прывязаўшы да ног вяроўкі, і скінулі ў канаву. У распараджэнні рэдакцыі ёсць відэазапіс, які пацвярджае гэтую версію – на ёй мужчыне страляюць у галаву. Пры гэтым сам ён апрануты ў ваенную форму з украінскімі апазнавальнымі знакамі.
На відэазапісы адрэагавалі ў Вярхоўнай Радзе: упаўнаважаны па правах чалавека Зміцер Лубінец заявіў, што звярнуўся ў Офіс генпракурора Украіны. Таксама рыхтуюцца звароты ў ААН, Еўрапейскі камітэт па прадухіленні катаванняў і Міжнародны Чырвоны Крыж.
«Мы зноў будзем праводзіць кансультацыі з Міжнародным камітэтам Чырвонага Крыжа для ўзмацнення ціску з боку краін свету адносна прымусу выканання расейскім бокам абавязацельстваў у дачыненні да ваеннапалонных», – паведаміў Лубінец.
Ён падкрэсліў, што прыкладзе ўсе намаганні для таго, каб выканаўцы і камандзіры з ліку расейскіх ваенных панеслі адказнасць за ўчыненыя ваенныя злачынствы.
Алена Рувіна belsat.eu
