Амерыканскае вайсковае агенцтва мяркуе, што расейскія ўлады паступова змяняюць прыярытэты ўварвання ва Украіну. У Пэнтагоне мяркуюць, што пасля больш як месяца вайны расейскае войска будзе засяроджвацца вакол Данбасу, які станецца іх галоўнай мэтай. Пра гэта паведаміў на адмысловай канферэнцыі прэс-сакратар Пэнтагону.
Агенцтва прапанавала тры магчымыя прычыны расейскай пераарыентацыі:
- спроба адрэзаць частку ўкраінскага войска ад астатняй краіны,
- атрыманне рычагоў уплыву для будучых мірных перамоваў,
- агульныя змены ўласных стратэгічных мэтаў.
Прадстаўнік Пэнтагону заявіў:
«Магчыма, яны пераацэньваюць свае стратэгічныя мэты, бо яны відавочна больш не рухаюцца на Кіеў. Але мы гэтага не ведаем дакладна, і я хачу быць вельмі канкрэтным. Проста мы не зусім упэўненыя, што хаваецца за гэтай зменай прыярытэтаў. Усё, што я магу вам сказаць, – гэта тое, што мы бачым, і тое, што мы бачым, – гэта працяг змены прыярытэтаў на Данбасе».
У той жа час ЗША пакуль не бачаць грунтоўных падставаў меркаваць, што Расея абмяжуе сваю ўвагу Данбасам.
Нагадаем таксама, што сёння ў Стамбуле стартуе чарговы этап перамоваў аб спыненні агню ва Украіне.
ХЗ belsat.eu
