Памежная ахова Польшчы паведаміла, што за содні 27 лістапада не было ніводнай спробы парушэння мяжы з боку Беларусі. Гэта адбылося ўпершыню за больш чым два гады.
«Упершыню за больш чым два гады, са жніўня 2021 года, не было зафіксавана ніводнай спробы незаконнага пранікнення з Беларусі. Ніхто не падышоў да мяжы з мэтай яе фарсіравання», – гаворыцца ў паведамленні Памежнай аховы Польшчы.
У ведамстве пры гэтым адзначылі, што «гібрыдная вайна на мяжы не спыняецца» і сёння, 28 лістапада, група «агрэсіўна настроеных замежнікаў» атакавала польскія патрулі, кідаючы камяні і галіны. Абышлося без пацярпелых.
У лістападзе Польшча налічыла каля 1300 спробаў парушэння мяжы з тэрыторыі Беларусі, а з пачатку года – 25 500. Сёлета былі затрыманыя грамадзяне 52 дзяржаваў.
Варшава называе крызіс на мяжы «штучна створаным шляхам нелегальнай міграцыі», а ў Менску кажуць, што «Еўропа сама паклікала гэтых людзей», расказваюць пра «зверствы» памежнікаў з суседніх краінаў ЕЗ, паведамляюць пра выпадкі смерці мігрантаў у памежных раёнах.
Сцяпан Кубік belsat.eu
