Мясцовыя ўлады распачалі збор звестак пра мужчынаў на патрабаванне ваенкаматаў. Чытачы «Белсату» паведамляюць, што чыноўнікі просяць мужчынаў падаць ім свае асабістыя звесткі.
Чытач «Белсату» распавёў, што ў сельсавеце, куды ён пайшоў па даведку, уяго запыталі асабісты нумар тэлефона і папрасілі паказаць пасведчанне кіроўцы.
«Я вельмі здзівіўся такому пытанню і перапытаў, а навошта ім маё пасведчанне кіроўцы. У адказ прагучала, што гэта патрабаванне ваенкамату, які распачаў збіраць звесткі пра ўсіх ваеннаабавязаных мужчынаў», – кажа чытач «Белсату».
Мужчына адзначае, што здзівіўся, бо ніколі раней ваенкамат не збіраў такой інфармацыі, і як так можа быць, што дзяржаўныя структуры не могуць атрымаць адна ад другой звестак пра грамадзянаў.
Тым часам у Беларусі пасля сустрэчы ў Сочы Лукашэнкі з Пуціным сілавікі распачалі раптоўнае правяранне баявой і мабілізацыйнай гатовасці вайсковай часткі № 06752, што ў Мачулішчах пад Менскам. Паступаюць паведамленні пра тое, што ў нашую краіну чыгункаю пойдуць вайсковыя эшалоны з Расеі. Эксперты заяўляюць, што Лукашэнка можа аддаць загад на ўступленне Беларусі ў вайну супраць Украіны на баку Крамля.
Алена Аляксандрава belsat.eu
