У сумеснай заяве журналісцкія арганізацыі назвалі рашэнне Вярхоўнага Суду Беларусі аб пазбаўленні Беларускай асацыяцыі журналістаў рэгістрацыі «пародыяй на справядлівасць».
«Пасля правядзення сфальсіфікаваных выбараў, каб захаваць уладу, беларускі дыктатар, Аляксандр Лукашэнка, прыступіў да поўнай ліквідацыі ўсіх слаёў беларускай грамадзянскай супольнасці, – заявіў Прэзідэнт Еўрапейскай федэрацыі журналістаў Могенс Бліхэр Б’ерэгард. – Гэтая беспрэцэдэнтная чыстка павінна мабілізаваць міжурадавыя арганізацыі. Мы заклікаем Еўразвяз, Раду Еўропы, АБСЭ і ААН рашуча адрэагаваць. Тыя, хто ліквідуе НДА і ладзіць рэпрэсіі, мусяць быць жорстка пакараныя».
«Дыктатар моцна памыляецца, калі думае, што гэты суд пакладзе канец дзейнасці БАЖу, – дадаў Генеральны сакратар Еўрапейскай федэрацыі журналістаў Рыкарда Гуцьерэс. – Мы будзем дапамагаць нашаму беларускаму філіялу падтрымліваць існаванне і дзейнасць. БАЖ ніколі не здасца. БАЖ цяпер як ніколі застаецца для нас адзінай прадстаўнічай арганізацыяй журналістаў у Беларусі. БАЖ працягне падтрымліваць журналістаў і працаўнікоў медыяў. Ужо запланаваныя ініцыятывы па мабілізацыі лідарства БАЖу і сябраў арганізацыі».
ГГ, belsat.eu