Літва падазрае высланых беларусаў у працы на выведку, Беларусь літоўцаў – у «падвышэнні градусу эскалацыі».
Днём 28 траўня Міністэрства замежных справаў Літвы абвясціла аб выстаўленні Беларусі ноты з абвяшчэннем двух супрацоўнікаў беларускай амбасады непажаданымі асобамі праз «дзейнасць, несумяшчальную з дыпламатычным статусам». Ад гэтых двух патрабавалі пакінуць Літву цягам сямі дзён.
У афіцыйным каментары міністр замежных справаў Літвы Вітаўтас Ландсбергіс растлумачыў, што гэтае рашэнне таксама ёсць выражэннем салідарнасці з Латвіяй (Беларусь і Латвія 24 траўня «абмяняліся» высылкай амбасадараў і ўсіх супрацоўнікаў амбасадаў).
Ды ў сваім Twitter міністар заявіў, што дыпламаты, якіх высылаюць, гэта «два афіцэры беларускай выведкі, якія працавалі пад дыпламатычным прыкрыццем».
Прэс-сакратар Міністэрства замежных справаў Беларусі Анатоль Глаз 28 траўня заявіў, што расцэньвае крок Літвы як неабгрунтаваны і лічыць «адным з лагічных тлумачэнняў» тое, што «ў Літве свядома падвышаюць градус эскалацыі ў адносінах з Беларуссю».
Ён дадаў, што Беларусь таксама вышле двух літоўскіх дыпламатаў за «дзейнасць, несумяшчальную са статусам дыпламатычнага супрацоўніка». Аднак што гэта за дзейнасць, беларускі бок не казаў.
АА belsat.eu