Улады ліквідуюць юрыдычную асобу Менскай урбаністычнай платформы. Адпаведную заяву Менскі гарвыканкам падаў 24 жніўня, паведамілі ў арганізацыі.
Афіцыйная прычына ліквідацыі – «неажыццяўленне камерцыйнай арганізацыяй прадпрымальніцкай дзейнасці на працягу 24 месяцаў запар».
Як адзначаюць у платформе, арганізацыя некамерцыйная і мае права ажыццяўляць камерцыйную дзейнасць. Больш за тое, цяпер яна рэалізоўвае пяты камерцыйны праект за апошнія паўтара года.
«Цяпер складана спрагназаваць, чым усё скончыцца ў прававым полі Беларусі. Аднак ведаем дакладна: Менская ўрбаністычная платформа застаецца верная сваёй місіі ды каштоўнасцям», – адзначылі прадстаўнікі ініцыятывы.
Яны абяцаюць надалей рабіць важныя праекты для беларускіх гарадоў, займацца добраўпарадкаваннем, навучаць, дапамагаць дваровым супольнасцям.
Нагадаем, што Менскі гарвыканкам сярод іншага пастанавіў зліквідаваць і Цэнтр візуальных і выканальніцкіх мастацтваў «АРТ Карпарэйшн». Пастанову прынялі 25 жніўня.
Цэнтр «АРТ Карпарэйшн» быў створаны ў 2010 годзе пры падтрыманні «Белгазпрамбанку» і Міністэрства культуры. На яго базе рэалізоўваліся буйныя кінематаграфічныя, тэатральныя і адукацыйныя праекты, у тым ліку Міжнародны форум тэатральнага мастацтва «ТэАрт» і Менскі міжнародны кінафестываль «Лістапад».
МГ belsat.eu
