Лукашэнка просіць у Пуціна $ 250 млн на лесанарыхтоўчую тэхніку і імпартазамяшчэнне
Аляксандр Лукашэнка правёў сёння ў Менску сустрэчу з губернатарам Самарскай вобласці Дзмітрыем Азаравым. БелТА паведамляе, што на сустрэчы абмеркавалі развіццё праграмы імпартазамяшчэння і напрамкі супрацы. Лукашэнка таксама распавёў, што марыць развіць гандаль з Самарскай вобласцю да $ 1 млрд і прасіў у Пуціна $ 250 млн.
Пад час сустрэчы Лукашэнка заявіў, нібыта санкцыі Захаду яшчэ больш умацавалі пазіцыі беларускіх тавараў на расейскім рынку. Ён лічыць, што ва ўмовах санкцыяў беларускія тавары запатрабаваныя ў Расеі ў вялікіх аб’ёмах, а ўрад мусіць задаволіць усе імпартазамяшчальныя кантракты. Лукашэнка паскардзіўся, што працэсу часам шкодзіць «валакіта» як у Беларусі, так і ў Расеі.
Лукашэнка распавёў, што ён абмяркоўваў праграму імпартазамяшчэння з Пуціным падчас апошняга візіту ў Расею. Ён адзначыў, што на сустрэчы пастанавілі мець жорсткі кантроль, каб зрэалізаваць усе 15 праектаў супольнай праграмы імпартазамяшчэння. Лукашэнка паскардзіўся, што спачатку не ўсё было ахвотна прынятае расейскімі чыноўнікамі.
Таксама Лукашэнка распавёў, што Расея дала $ 1,5 млрд на праграму імпартазамяшчэння, якія ён хоча неадкладна асвоіць. Інакш, з ягоных словаў, людзі будуць незадаволеныя, як пры распадзе СССР, калі праз «пральныя парашкі і лусту хлеба» з прычыны народнай незадаволенасці і пры дапамозе «нікчэмных палітыкаў» развалілася «велізарная імперыя».
Пазней Лукашэнка прызнаўся, што прасіў у Пуціна $ 250 млн на лесанарыхтоўчую тэхніку. Лес Лукашэнка назваў «другой нафтай».
«Я прэзідэнту гэта ўсё расклаў. Без гэтага ж мы не абыдземся, асабліва Расея. Гэта, як я сказаў, нашая другая нафта (лясныя рэсурсы). І пад гэта сёння, каб усё гэта разгарнуць як імпартазамяшчэнне, трэба мінімум ад 200 да 250 мільёнаў долараў. Ён кажа: гэта цікавы праект, мы мусім вывучыць яго і абавязкова прасоўваць. Ва ўрадах трэба цяпер, каб гэты праект пайшоў. Можа быць, і Самарская вобласць знойдзе ў гэтым сваё месца», – сказаў Лукашэнка.
Нагадаем, што 25 чэрвеня Аляксандр Лукашэнка сустрэўся з Уладзімірам Пуціным у Санкт-Пецярбурзе, дзе стала вядома, што Пуцін усё-ткі не прыедзе ў Горадню на «Форум рэгіёнаў». Аднак прэзідэнт Расеі паабяцаў найбліжэйшым часам паставіць у Беларусь ракетныя комплексы «Іскандэр». Лукашэнка, у сваю чаргу, прасіў ядравую зброю.
Раман Лугоўскі belsat.eu
