Жаночая баскетбольная зборная 26 чэрвеня ў чацвёрты раз у сваёй гісторыі згуляла ў паўфінале чэмпіянату Еўропы. Але перамагчы каманду Францыі на гэтай стадыі не ўдалося.
Пасля матчу атакуючы абаронца зборнай Беларусі па баскетболе Таццяна Ліхтаровіч адправілася на прэс-канферэнцыю. Пасля пытанняў мадэратар прапанаваў гульцу звярнуцца да заўзятараў, паведамляе Tribuna.com.
Таццяна падзякавала заўзятарам і заклікала падтрымаць каманду фразай «Верым, можам, пераможам».
«Дзякуй усім, хто за нас заўзее, працягвайце. Як я і казала да гэтага: «Верым, можам, пераможам», – сказала Ліхтаровіч.
Спартсменка Таццяна Ліхтаровіч – падпісантка ліста за сумленныя выбары і выказвае салідарнасць з пратэстуючымі беларусамі.
Заўзятары зборнай Беларусі па баскетболу прыйшлі падтрымаць каманду з БЧБ-сцягамі. Аднак калі ў кадр трапляў БЧБ-сцяг, у трансляцыі на беларускім дзяржтэлебачанні яго перакрывалі статычнай карцінкай.
На выхадзе з арэны заўзятары пракрычалі камандзе «Дзякуй».
АД, belsat.eu