Два тыдні таму Юрый Васкрасенскі ўзгадваў у сваім тэлеграм-канале, што прадстаўнікі так званага Круглага стала дэмакратычных сілаў наведваюць у Кіеве адміністрацыйныя будынкі і праводзяць кансультацыі з афіцыйнымі асобамі.
На адным з фотаздымкаў прадстаўнік Круглага стала трымаецца за ўваходныя дзверы будынку упаўнаважанага Вярхоўнай рады па правах чалавека.
«Белсат» адправіў запыт Сакратарыяту ўпаўнаважанага Вярхоўнай рады па правах чалавека, дзе нібыта, па інфармацыі Васкрасенскага, быў прадстаўнік КСДС Уладзіслаў Кацарэнка.
У адказным лісце сцвярджаецца наступнае:
«Устаноўлена, што інфармацыя пра ўваход Юрыя Васкрасенскага і Уладзіслава Кацарэнкі да адміністрацыйнай часткі будынку Сакратарыяту адсутнічае ў журнале часовага пропуску.
Пасля прагляду відэа з камераў відэаназірання Сакратарыята ўстаноўлена, што асоба, пазначаная на фатаграфіі, падышла да дзвярэй Сакратарыята і сфатаграфавалася».
Між тым самога Юрыя Васкрасенскага прызналі пагрозай нацыянальнай бяспецы Украіны і забаранілі ўезд да 2024 года. Яго развярнулі на мяжы 22 кастрычніка, калі той ехаў у Кіеў.