Латвійскія лінгвісты адкінулі прапанову пра змену назвы нашай краіны на латышскай мове. Пра гэта паведаміў Цэнтр дзяржаўнай мовы Латвіі, піша Delfi.lv.
На сённяшні дзень назва «Беларусь» у латышскай мове пішацца як «Baltkrievija». З’явілася прапанова пачаць дыскусію пра змену назвы на «Baltrutenia», а беларусаў называць «baltrutēņi» замест «baltkrievi».
Аднак пасля разгляду гэтага пытання камісія спецыялістаў вырашыла не падтрымліваць зменаў і пакінула ранейшую назву – «Baltkrievija».
У 2019 годзе Швецыя перастала называць Беларусь «Белай Расеяй». Шведскі ўрад адмовіўся ад выкарыстання ў афіцыйных дакументах назвы «Vitryssland» і пачаў выкарыстоўваць найменне «Belarus». У Нямеччыне пачынаючы з 2020 года таксама больш шырока пачалі выкарыстоўваць назву «Belarus» замест ранейшага «Weißrussland».
У 2021 годзе Святлана Ціханоўская звярнулася да літоўскіх уладаў з просьбай замацаваць у якасці афіцыйнай назвы нашай краіны ў літоўскай мове назву «Belarusia». Дзяржаўная камісія ў пытаннях літоўскай мовы разгледзела прапанову і выставіла на абмеркаванне тры назвы: «Gudija», «Baltarusia» ці «Baltoji Rusia» («Гудыя», «Беларусь», «Белая Русь»). Пакуль ніводзін з варыянтаў не зацверджаны.
Раман Шавель belsat.eu