На аэрадроме ў Мачулішчах пад Менскам учынены падрыў расейскага самалёта далёкага радыёлакацыйнага выяўлення і кіравання А-50, сцвярджае ў сваім Telegram-канале аб’яднанне «ByPol» са спасылкаю на ўдзельнікаў плана «Перамога». Паводле гэтай інфармацыі, пашкоджанні сур’ёзныя, і «самалёт дакладна ўжо нікуды не паляціць».
У выніку двух выбухаў пацярпелі пярэдняя і цэнтральная часткі самалёта, пашкоджаная авіёніка і радыёлакацыйная антэна.
У момант падрыву побач працавала снегаўборачная тэхніка, якую зачапіла выбухной хваляй.
«Беларускія партызаны паслядоўныя ў выгнанні фашыстаў са сваёй зямлі», – адзначаецца ў паведамленіі «ByPol».
«Беларускі Гаюн» не выключае версію, што выбухоўку на самалёт скінулі з паветра.
Расейскі ваенкор Сямён Пегаў у сваім канале «WarGonzo» заявіў, што атрымаў ад сваіх крыніцаў у Беларусі пацверджанне інфармацыі пра выбухі. Самай верагоднай версіяй ён называе атаку беспілотнікаў. Здарэнне ў Мачулічшах ягоныя крыніцы параўноўваюць з інцыдэнтамі ў Саратаве ў снежні летась, калі ў выніку двух атак дронаў загінулі тры асобы, шэсць пацярпелі, была пашкоджаная тэхніка.
Паводле розных звестак, сёння жыхары Мачулішчаў чулі ці то два, ці то тры выбухі. У раёне авіябазы заўважылі сілавікоў са зброяй і ў бронекамізэльках, перасоўванне вайсковых МАЗаў, машын Следчага камітэту і хуткай дапамогі, у небе – верталёт. Інспектары ДАІ спыняюць аўтамабілі і маршруткі, правяраюць дакументы і багажнікі, у некаторых – нават мабільныя тэлефоны.
Telegram-канал «МотолькоПомоги» піша, што «па кватэрах пачаў хадзіць АМАП у поўным рыштунку», і некага шукаюць. У сілавікоў нібыта ёсць нейкі «бчб-спіс».
У мясцовым чаце выдаляюць усе паведамленні відавочцаў пра здарэнне і праверкі на дарогах.
Такія самалёты-лакатары называюць «паветраным штабам» Паветрана-касмічных сілаў Расеі. Яны забяспечваюць суправаджэнне цэляў, кіраванне знішчальнікамі, навядзенне, а таксама ранняе выяўленне і супрацьдзеянне паветраным пагрозам. А-50 цяпер выкарыстоўваецца падчас бамбавання Украіны.
Расея мае 9 такіх бартоў. Вытворчасць аднаго каштуе каля 330 млн долараў.
Сяргей Крот belsat.eu