МУС расцаніў сустрэчу з 12-гадовай расейскай блогеркай Міланай Хаметавай як «несанкцыянаванае масавае мерапрыемства».
Днём 24 верасня ў ГЦ «Dana Mall» прайшла сустрэча з 12-гадовай расейскай блогеркай Міланай Хаметавай, на ёй прысутнічала некалькі тысяч чалавек. У нейкі момант праз перагрузку ліфта адбыўся экстраны прыпынак кабіны, дзе пачалася цісканіна. У выніку па медычную дапамогу звярнуліся пяцёра малалетніх дзяцей.
Следчы камітэт увечары паведаміў, што распачаў праверку па факце траўмавання дзяцей.
МУС позна ноччу апублікаваў прэс-рэліз, дзе распавядалася, што днём 24 верасня яны спынілі правядзенне «несанкцыянаванага масавага мерапрыемства» ў ГЦ «Dana Mall» і «з мэтай недапушчэння цісканіны прынялі захады па разгрупаванні групаў маладых людзей як у самім ТРЦ, так і каля яго».
«Цяпер высветлены і затрыманы арганізатар несанкцыянаванага масавага мерапрыемства ў ТРЦ. Высвятляюцца асобы, якія маюць дачыненне да яго арганізацыі. Вінаватыя будуць прыцягнуты да ўстаноўленай законам адказнасці», – адзначаецца ў заяве міліцыі.
Пры гэтым пра траўмаванне дзяцей у прэс-рэлізе нічога сказана не было.
Глеб Нержын belsat.eu
