У Судзе Івацэвіцкага раёну 29 жніўня пройдзе паседжанне па замене палітзняволенаму Сцяпану Латыпаву пакарання на больш жорсткае, паведамляюць праваабаронцы. Верагодна, яго збіраюцца пераводзіць на турэмны рэжым. Цяпер жа палітвязень адбывае тэрмін у калоніі ўзмоцненага рэжыму № 22 «Воўчыя норы».
У сярэдзіне траўня Сцяпана перавялі ў памяшканне камернага тыпу (ПКТ) на пяць месяцаў. За першыя два тыдні там палітвязень атрымаў толькі два лісты. Таксама ў калоніі яго змяшчалі ў ШІЗА агулам на 32 дні, 27 з іх ён адбыў у лютым.
Памяшканне камернага тыпу – распаўсюджаны метад ціску. Гэта такая спецыяльная камера, дзе вязні маюць права атаварвацца ў турэмнай краме на адну базавую велічыню за месяц, атрымліваць адну бандэроль цягам шасці месяцаў, мець штодзённы шпацыр на 30 хвілінаў і хадзіць на працу. Падчас прагулкі забаронена стасавацца з іншымі зняволенымі. Спатканні і званкі забароненыя.
Нагадаем, што 16 жніўня Сцяпана Латыпава асудзілі да 8,5 года калоніі ва ўмовах узмоцненага рэжыму і аштрафавалі на 300 базавых велічыняў. Сцяпана абвінавацілі ў стварэнні дваровага тэлеграм-чату, майстэрні для вырабу пратэснай сімволікі, супраціве міліцыянтам пры затрыманні 15 верасня. Акрамя гэтага, як дырэктара кампаніі «Беларбо» яго прызналі вінаватым ва ўвядзенні ў зман кліентаў пры наданні паслуг у хімічнай абароне раслінаў. Сам Латыпаў на судзе віны не прызнаў.
Алена Рувіна belsat.eu