У Беларусі хочуць стварыць рэзервы матэрыяльных рэсурсаў на выпадак надзвычайных сітуацыяў
У Беларусі ствараецца рэспубліканскі рэзерв матэрыяльных рэсурсаў для ліквідацыі надзвычайных сітуацыяў прыроднага і тэхнагеннага характару. Такую пастанову прыняў Савет Міністраў 23 кастрычніка, дакумент апублікаваны на Нацыянальным прававым інтэрнэт-партале.
Рэспубліканскі рэзерв будзе ўключаць «запасы харчавання, будаўнічых матэрыялаў, нафтапрадуктаў, сродкаў забеспячэння жыццядзейнасці, іншых матэрыяльных каштоўнасцяў». Выкарыстоўваць яго рэсурсы можна будзе толькі на даручэнне прэм’ер-міністра і «ў выпадку недастатковасці галіновых і тэрытарыяльных рэзерваў матэрыяльных рэсурсаў для ліквідацыі надзвычайных сітуацыяў».
Згодна з дакументам, рэзервы арганізоўваюць «загадзя ў мэтах экстраннага прыцягнення неабходных рэсурсаў» на выпадак узнікнення надзвычайных сітуацыяў і ліквідацыі іх наступстваў, каб забяспечыць умовы для жыццядзейнасці людзей.
Гэтак, у сістэму рэсурсных рэзерваў будуць уваходзіць рэзерв ураду ў складзе дзяржаўнага матэрыяльнага рэзерву Савету Міністраў; у сістэму галіновых – рэзервы дзяржаўнага кіравання і іншых арганізацыяў, падпарадкаваных Савету Міністраў; у тэрытарыяльныя – рэзервы мясцовых уладаў; у аб’ектавыя – рэзервы арганізацыяў, адказных за абарону насельніцтва ад надзвычайных сітуацыяў.
Галіновыя рэзервы створаць у 11 міністэрствах:
- архітэктуры і будаўніцтва;
- аховы здароўя;
- энергетыкі;
- сувязі і інфарматызацыі;
- прамысловасці;
- транспарту і камунікацыяў;
- жыллёва-камунальнай гаспадаркі;
- лясной гаспадаркі;
- сельскай гаспадаркі і харчавання;
- антыманапольнага рэгулявання і гандлю;
- прыродных рэсурсаў і аховы навакольнага асяроддзя.
Акрамя таго, падсістэмы павінны быць у Дзяржаўным мытным камітэце, «Белкаапсаюзе», канцэрнах «Белнафтахім», «Белдзяржхарчпрам», «Беллегпрам» і «Беллеспаперапрам».
Алена Рувіна belsat.eu
