Сёння, 24 верасня, у судзе Маскоўскага раёну Берасця пачалі працэс над восьмаю групай у «карагоднай справе». Судзіць Марыя Аліфярук.
Вінавацяць шасцёх асобаў: Алега Кулеша (яго прывозяць на суд з СІЗА), Сяргея Кунцэвіча, Ганну Кашырскіх, Дзмітрыя Макарэвіча, Таццяну Пякарскую і Мікіту Дзмітрыева. Гэта самая малая група ў «карагоднай справе».
«Працэс пачаўся спакойна, мы на судзе толькі назвалі сябе, пачаўся перапынак. Пакуль гэтая машына не спыняецца ды рухаецца далей, збіраюцца дзявяты і дзясяты сезоны. Пакуль, на жаль, мы ў такой сітуацыі. Так, у нас самая маленькая група, але гэта нічога не значыць: людзей шукаюць, яны сабралі яшчэ дзве групы», – кажа ў размове з «Белсатам» Таццяна Пякарская.
У любой з гэтых групаў мог апынуцца берасцеец Ілля Сіліч, моцна збіты падчас адной з акцыяў. Мужчына здолеў уцячы за мяжу:
«На жаль, «карагодную справу» на мяне так і не завялі, нават крыху крыўдна, бо ў маім паслужным спісе – дзве крымінальныя справы. Тады, 13 верасня, падчас карагоду я быў у цэнтры падзеяў. Карагод распачаўся знянацку: людзі стаялі і спрачаліся, у якім кірунку ісці, з калонкі гучала музыка, і людзі раптам запусцілі карагод. Без нейкай каманды, прапановы, проста калектыўнае бессвядомае, атмасфера свята непаслухмянасці. Вадамёт пад’ехаў знянацку, я якраз адышоў на ходнік».
Умомант свята ператварылася ў жах. Пачаўся разгон. Вадамёт у Берасці тады выкарысталі ўпершыню.
«Людзі мірна танчылі ў святочнай атмасферы, былі і дзеці, і шарыкі. І раптам гэты вадамёт наляцеў на нас, нібы мы футбольныя фанаты, якія нішчаць крамы. Мы разбегліся, бо за вадамётам высадзіўся АМАП і пачаў хапаць людзей. Я схаваўся ў падʼезде, памятаю, як бусікі без апазнавальных знакаў, як шакалы, ездзілі па дварах і хапалі людзей. Гэта ўжо была атмасфера фільмаў, дзе гестапаўцы палююць на габрэяў», – кажа Ілля Сіліч.
У «карагоднай справе» на сёння асудзілі 81 чалавека. Сумарна прысудзілі 66,5 года абмежавання волі ў папраўчай установе адкрытага тыпу («хіміі») і 63,5 года абмежавання волі без накіравання ў папраўчую ўстанову («хатняй хіміі»), а таксама 7 гадоў і 7 месяцаў калоніі. Агулам выявілі 115 чалавек, якія мелі дачыненне да берасцейскага карагоду, 108 з іх пачулі абвінавачанні.
13 верасня мінулага года ў Берасці адбывалася чарговая пратэставая акцыя. Людзі маршам прайшлі па праезнай частцы праспекту Машэрава ды спыніліся на яго скрыжаванні з бульварамі Касманаўтаў і Шаўчэнкі. Некалькі соцень асобаў утварылі карагод. Была музыка, свята, нібыта карнавал – так згадваюць тыя падзеі відавочцы.
Разганяць карагод прыехаў вадамёт, ужыты ўпершыню падчас пратэстаў у Беларусі. З таго часу берасцейцы называюць гэтае скрыжаванне вадамётным, а распачатая пазней крымінальная справа стала звацца карагоднаю.
Праз некалькі тыдняў завялі крымінальную справу паводле артыкулу 342 КК («Арганізацыя і рыхтаванне дзеянняў, што груба парушаюць грамадскі парадак»). Для яе сілавікі старанна падбіралі людзей: праглядалі камеры відэаназірання і матэрыялы журналістаў, затрымлівалі ды апытвалі берасцейцаў.
Выракі першай дзясятцы агучыў Святаслаў Каліна ў судзе Ленінскага раёну Берасця. 25-гадовая настаўніца замежных моваў Марына Глазава (першая ў гэтай справе апынулася ў СІЗА) і Яраслаў Ярашук атрымалі па 1,5 года «хатняй хіміі», 20-гадовая студэнтка філфаку БДУ Марына Сірэцан – 1 год. Яшчэ семярым удзельнікам працэсу прысудзілі «хімію»: Мікалаю Федарэнку, Яўгену Калпачыку, Аляксею Якубуку, Віктару Дзенісенку і Віталю Літвіну – па 1,5 года, Максіму Жараву і Вадзіму Варановічу – па 2.
Працэс над другім дзясяткам вёў Дзмітрый Шурын, суддзя Ленінскага раёну. Ён прызначыў калонію з агульным рэжымам тэрмінам на 1 год і 8 месяцаў Дзмітрыю Буневічу і 1,5 года Аляксею Арцецкаму. Два гады «хіміі» атрымалі Дзмітрый Абрамук і Павел Брух, 1,5 года «хіміі» – Аляксей Бараноўскі, Дзмітрый Качурка і Уладзімір Талатынік, а Генадзь Місюта – 1,5 года «хатняй хіміі».
Абвінавачанне трэцяй групе вынесла суддзя Маскоўскага раёну Іна Клышпач: Алене Гнаўк, Марыі Скакавец, Васілю Чарнецкаму – 2 гады «хатняй хіміі»; расейцу Данілу Чамаданаву – 1 год калоніі агульнага рэжыму; Сяргею Наліўку, Кірылу Луду, Уладзіславу Навіцкаму, Віктару Лабку і Радзівону Кандрацюку – 2 гады «хіміі»; маці і дачцэ Алене і Вікторыі Лысковіч – 1,5 года «хіміі»; Юрыю Чубырку, Валянціне Жукоўскай і Людміле Луцкай – 1,5 года «хатняй хіміі».
Суддзя Сяргей Маручак у судзе Берасцейскага раёну 8 чэрвеня агучыў выракі чацвёртай групе фігурантаў берасцейскай «карагоднай справы». Раман Дземідовіч, Марына Дарашук, Святлана Марчук, Алеся Крамчаніна, Вікторыя Каральчук атрымалі 1,5 года «хатняй хіміі»; муж і жонка Андрэй і Паліна Ляшко – па 1,5 года «хіміі» і «хатняй хіміі» адпаведна; пружанскі паэт і пчаляр Мікалай Папека – 2 гады «хіміі»; палітзняволены сын Арсень і бацька Яўген Сінякі – па 2 гады «хіміі». Палітзняволеная 34-гадовая Вольга Глушань – 1,5 года «хатняй хіміі», палітзняволены 46-гадовы Раман Яхін – 2 гады «хатняй хіміі».
3 чэрвеня ўсудзе Маскоўскага раёну суддзя Яўген Брэган агучыў вырак пятай групе: Аляксандр Храпко – 1 год і 1 месяц калоніі ўзмоцненага рэжыму; Ілля Палхоўскі – 2 гады «хіміі»; Андрэй Аніскевіч – 1,5 года «хіміі»; Алена Лайко, Галіна Чугунова – па 2 гады «хатняй хіміі»; Ігар Вінакураў, Сяргей Ксянжук, Дзмітрый Курганаў, Радзівон Медушэўскі, Андрэй Нямірскі, Сафія Нішт, Кацярына Смірнова, Мікіта Увараў – 1,5 года «хатняй хіміі».
Шостая група, суд Маскоўскага раёну, суддзя Вера Філонік. 2,5 года калоніі прызначылі бацьку траіх дзяцей Ігару Лаптановічу, ягонай жонцы Юлію – 3 гады «хатняй хіміі». 3 гады «хіміі» далі Андрэю Касцюку, 2,5 года «хіміі» – Наталлі Шыле і Уладзіміру Макарэвічу. Астатнім фігурантам – Таццяне і Аляксею Біруковым, Арцёму Андрасюку, Дар’і Дзямʼянцы, Канстанціну Пяцінкіну, Сяргею Дзягцярыку і Андрэю Парфееўцу – прысудзілі 2 гады «хатняй хіміі» кожнаму.
30 жніўня ў судзе Ленінскага раёну Берасця прагучаў вырак сёмай групе фігурантаў у межах «карагоднай справы». Тэрміны, вынесеныя суддзём Дзмітрыем Куроўскім, не адрозніваюцца ад тых, што запрасілі дзяржаўныя абвінаваўцы Аляксандр Бацюшка і Міхаіл Юшчук. Канстанцін Свідуновіч, Сяргей Канановіч, Аляксандр Жук, Глеб Нікановіч, Ігар Сямыкін атрымалі 1,5 года «хіміі». Кацярына Бровач, Юрый Сацюк – 1,5 года «хатняй хіміі». Арцёму Ласкаму прысудзілі 2 гады «хіміі», пенсіянеру Віктару Астрошку – 2 гады «хатняй хіміі». Іллю Ягораву інкрымінавалі яшчэ адзін артыкул КК («Зацятае хуліганства») і далі 2,5 года «хіміі», Данілу Дзяткоўскага паводле таго ж артыкулу пакаралі двума гадамі «хіміі». Ігару Вінакураву суд даў 2,5 года «хіміі» (уключна з прысудам на 1,5 года «хіміі» паводле «карагоднай справы»).
АЛ belsat.eu