У лагеры ПВК Вагнэра каля вёскі Цэль пад Асіповічамі прыбралі траціну ўсіх намётаў, піша радыё «Свабода» са спасылкай на эксклюзіўныя спадарожнікавыя здымкі сэрвісу «Planet Labs».
Аналізуючы спадарожнікавыя здымкі, выданне падлічыла, што з 273 жылых намётаў каля 101 ужо дэмантаваныя. А значыцца, тэрыторыю вайсковай частцы ў Цэлі маглі пакінуць прыкладна 2020 вайскоўцаў Групы Вагнэра. Пры гэтым змяншэння колькасці тэхнікі не назіраецца.
Як паведамляў 24 жніўня ўкраінскі Цэнтр нацыянальнага супраціву, паплечнікі Яўгена Прыгожына ў Беларусі «фармуюць калоны для выезду з лагераў». Паведамлялася таксама, што беларускія спецслужбы перашкаджаюць выезду наёмнікаў.
Аднак, паводле маніторынгавай групы «Беларускі Гаюн», вываду з лагеру сілаў наймітаў пакуль не назіраецца. Згадваецца толькі факт перабояў у працы інтэрнэту на тэрыторыі асноўнай базы ПВК Вагнэра ў Беларусі ўчора ўвечары, калі стала вядома пра магчымую смерць Яўгена Прыгожына.
«У цэлым можна канстатаваць, што сітуацыя на тэрыторыі лагеру не статычная і пастаянна мяняецца», – піша «Беларускі Гаюн».
Паводле ініцыятывы, у лагеры да 15 жніўня былі дэмантаваныя каля 35 намётаў.
Увечары 23 жніўня ў Цвярской вобласці разбіўся самалёт Яўгена Прыгожына «Embraer Legacy 600». На борце былі 10 чалавек. Паводле «Расавіяцыі», усе яны загінулі, у тым ліку заснавальнік ПВК Вагнэра Яўген Прыгожын.
Зміцер Міраш belsat.eu
