24 жніўня ў Менску адбылося паседжанне Рэспубліканскага педсавету – «самага маштабнага і значнага форуму для ўсёй сістэмы адукацыі», як яго назвалі ў афіцыйнай прэсе. «Маштабныя» і «значныя» заявы на форуме гучалі з вуснаў міністра адукацыі Ігара Карпенкі і Аляксандра Лукашэнкі, які выступаў на педсавеце. Вось 8 галоўных цытат.
«…паўлегальныя прыватныя дзіцячыя сады і школы пад шыльдай індывідуальных прадпрымальнікаў, грамадскіх ці рэлігійных аб’яднанняў у большасці выкарыстоўваліся ў палітычных мэтах, станавіліся апорнымі кропкамі для каляровай рэвалюцыі, а іх супрацоўнікі і кіраўнікі апынуліся ў дэструктыўных арганізацыях рознага ўзроўню» (Ігар Карпенка).
«Цяпер вельмі важна не дапусціць уцягвання дзіцяці ў злачынную, экстрэмісцкую і іншую супрацьпраўную дзейнасць, апярэдзіць неабдуманыя крокі дзяцей і моладзі… у гэтым плане добра зарэкамендавалі сябе формы ўзаемадзеяння ўстановаў адукацыі з вайсковымі часткамі, структурамі МУС, установамі аховы здароўя, культуры і спорту, грамадскімі арганізацыямі. Такое ўзаемадзеянне будзем умацоўваць». (Ігар Карпенка).
«Сфармаваныя два аўтарскіх калектывы для распрацоўкі абноўленых навучальных дапаможнікаў па гісторыі Вялікай Айчыннай вайны для школ і ВНУ. Іх змястоўнае напаўненне будзе ажыццяўляцца пры ўдзеле студэнтаў гістарычных факультэтаў рэгіянальных універсітэтаў і галоўнай педагагічнай ВНУ краіны. Адпаведны загад міністра ўжо падпісаны». (Ігар Карпенка).
«А што сёння? Прэтэнзіяў да сучасных падручнікаў па-ранейшаму шмат. У тым ліку і з боку вас, практыкуючых педагогаў. Так быць не павінна. Эксперыменты з падручнікамі мусяць быць спыненыя. І вас, настаўнікаў у тым ліку, заклікаю: давядзіце да розуму тое, што напісана, і тады ўжо будзеце даваць справаздачу. Спадзяюся, што на маім узроўні размова пра падручнікі апошняя». (Аляксандр Лукашэнка).
«Гэта маё непахіснае патрабаванне як чалавека, які свае першыя крокі рабіў у школе – сельскім настаўнікам. Школа – гэта храм. І туды трэба прыходзіць як у храм. Парадак і дысцыпліна ў гэтым храме залежаць не толькі ад вернікаў, але і ад тых, хто адказвае за стан гэтага храма, гэта значыць настаўнікаў… Навядзіце парадак у школе, чаго б гэта нам ні каштавала. Я б нават сказаў больш: выкарыстоўвайце любыя метады, але навядзіце парадак у школе». (Аляксандр Лукашэнка).
«Пытанне, якое сёння, як кажуць, вісіць у паветры: ці мусіць школа ўдзельнічаць у палітычным жыцці краіны? Адказ адназначны: школа не можа быць па-за палітыкай. Наогул палітыкі не бывае без школы. Але палітыка там павінна быць толькі адна – дзяржаўная. Сцяг і гімн – дзяржаўныя. І давайце спынім размовы на гэтую тэму». (Аляксандр Лукашэнка).
«Шмат было выпрабаванняў. Гэта і пандэмія, якая стварыла стрэсавыя ўмовы і прымусіла на хаду перабудоўваць навучальны працэс. Гэта і палітычныя падзеі, якія закранулі работнікаў сістэмы адукацыі не менш, чым сілавікоў і дзяржаўных службоўцаў. І сёння я дзякую тым, хто не пахіснуўся, і ў вашых асобах усёй нашай педагагічнай грамадскасці за прафесіяналізм, адданасць сваёй справе і грамадзянскую пазіцыю, ад якой залежала шмат што». (Аляксандр Лукашэнка)
«Якую ацэнку мы з вамі мусім паставіць сабе за патрыятычнае выхаванне дзяцей? Напэўна, да 10 мы з вамі не дацягваем. Пра гэта кажуць факты…». (Аляксандр Лукашэнка)
Адным з новаўвядзенняў у школах з 1 верасня, аб якім ужо вядома, стане вяртанне ваенрукоў і заняткаў па ваенна-патрыятычнай падрыхтоўцы сярод школьнікаў.
ЗК/МВ belsat.eu