У Беларусі прайшла масавая праверка якасці навучання беларускіх школьнікаў. Генеральная пракуратура правяла праверкі ў Віцебскай і Гарадзенскай вобласцях, а таксама ў Менску. У выніку праверкі інстанцыя заявіла аб складанасці падручнікаў, памылках у навучальных матэрыялах і празмерна высокіх нагрузках на школьнікаў. Магчыма, на запыт пракуратуры падручнікі будуць змяняць, – заявілі ў жывым эфіры «Беларусь 1».
«Вынікі праверкі, праведзенай Генеральнай пракуратурай супольна з Нацыянальным інстытутам адукацыі, паказалі, што тэксты ў некаторых падручніках перагружаныя залішняй навуковай інфармацыяй. Прысутнічаюць факталагічныя памылкі і памылкі друку», – заявіла Вікторыя Фіневіч, начальніца аддзелу Генпракуратуры па наглядзе за выкананнем заканадаўства аб непаўналетніх і моладзі.
Паводле словаў прадстаўніцы Генпракуратуры, навучальная нагрузка на звычайнага школьніка сягае ад 50 да 65 гадзін на тыдзень і адпавядае занятасці дарослага працаўніка. Таксама падчас праверкі выявілі выпадкі парушэння заканадаўства аб дзяржзакупах і неэфектыўнага выкарыстання бюджэту, што таксама адбілася на зніжэнні якасці адукацыі.
На патрабаванне нагляднага ведамства профільныя спецыялісты займаюцца пытаннем замены школьных падручнікаў.
Нагадаем, што ў 2022 годзе ў Беларусі быў прызначаны новы міністр адукацыі. 10 лютага Андрэй Іванец заступіў на пасаду. Чыноўнік заявіў, што збіраецца ўмацоўваць патрыятызм і выхаванне ў даверанай яму сферы. Гэтым жа тыднем прадстаўнікі Генпракуратуры абвінавачвалі МУС і іншыя следчыя органы ў сабатаванні крымінальнага пераследу палітычных іншадумцаў у Беларусі.
ЗХ belsat.eu