У Лондане зацвердзілі адразу два санкцыйныя спісы супраць Беларусі. Абмежаванні ўводзяцца не толькі з прычыны вайны ва Украіне, але і праз парушэнні ўладамі Беларусі правоў чалавека, паведамляе Міністэрства фінансаў Вялікай Брытаніі.
У першы санкцыйны спіс трапілі кампаніі «Белспецзнештэхніка», Менскі завод колавых цягачоў (МЗКЦ), «Абаронныя ініцыятывы», «АКБ ТСП» і Дзяржаўны вайскова-прамысловы камітэт. З фізічных асобаў у спісе фігуруюць кіраўнік Дзяржкамваенпраму Дзмітрый Пантус і ягоны намеснік Вячаслаў Расалай, а таксама кіраўніцтва МЗКЦ – Аляксей Рымашэўскі і Аляксандр Вецяневіч.
Дадаткова Лондан увёў санкцыі за «ўчыненне сур’ёзных парушэнняў правоў чалавека ў Беларусі», «здушэнне грамадзянскай супольнасці і дэмакратычнай апазіцыі» ды іншыя дзеянні, што «падрываюць дэмакратыю або вяршэнства закону ў Беларусі».
У другі санкцыйны спіс трапілі 5 кампаніяў і адзін банк:
- банк «Дабрабыт»;
- лізінгавая кампанія «Белбізнеслізінг»;
- прадпрыемства «Мінатор-Сэрвіс» (займаецца распрацоўваннем, вытворчасцю і абслугоўваннем вайсковай тэхнікі);
- авіякампанія «Трансавіяэкспарт»;
- «Белінвест-інжынірынг»;
- «КБ Радар».
Вялікая Брытанія замарозіць рахункі і актывы юрыдычных асобаў, якія трапілі ў чорны спіс. А сваім рэзідэнтам урад рэкамендуе ўстрымацца ад аперацыяў са сродкамі ці актывамі гэтых кампаніяў.
ЗК belsat.eu
