Парламент Турцыі ратыфікаваў заяўку Швецыі на ўступленне ў NATO 23 студзеня. За прыняцце Швецыі ў альянс выступілі 287 парламентароў, а супраць – 55, піша «Reuters». Цяпер для канчатковага рашэння патрэбны подпіс прэзідэнта Турцыі Рэджэпа Эрдагана.
«Мы падтрымліваем пашырэнне NATO, каб палепшыць намаганні альянсу ў стрымліванні. Мы спадзяёмся, што стаўленне Фінляндыі і Швецыі да барацьбы з тэрарызмам паслужыць прыкладам для іншых нашых саюзнікаў», – кіраўнік парламенцкай камісіі замежных справаў Турцыі Фуат Актай.
«Я высока цаню пастанову турэцкага парламенту ўхваліць сённяшняе ўступленне Швецыі ў NATO», – сказаў амбасадар ЗША Джэф Блэйк.
Міністр замежных справаў Швецыі Табіяс Більстрэм таксама адрэагаваў на адабрэнне турэцкага парламенту:
«Цяпер мы з нецярпеннем чакаем, калі прэзідэнт Эрдаган падпіша ратыфікацыйны дакумент».
Швецыя ўпершыню падала заяўку ў NATO ў 2022 годзе пасля пачатку поўнамаштабнай вайны ва Украіне. Аднак усе чальцы NATO мусяць ухваліць заяўкі краінаў, якія жадаюць уступіць у альянс. Турцыя была супраць далучэння Швецыі і Фінляндыі ў NATO. Таксама заяўку Швецыі дасюль не ўзгадніла Вугоршчына.
У красавіку 2023 года Турцыя ўсё ж такі ўхваліла сяброўства Фінляндыі.
Арсен Рудэнка belsat.eu
