Афіцыйны прадстаўнік Берасцейскай памежнай групы Сяргей Дзмітрыеў паскардзіўся ў эфіры дзяржаўнага тэлеканалу СТВ на тое, што «ўкраінцы вывесілі сцягі бел-чырвона-белага колеру». На эпізод звярнуў увагу сайт Reform.by.
У сюжэце СТВ распавялі пра «не заўсёды адэкватныя паводзіны ўкраінскіх вайскоўцаў». Прадстаўнік беларускага боку паскардзіўся, што каля двух месяцаў таму на ўкраінскіх пунктах пропуску каля ўчасткаў Берасцейскай памежнай групы пачалі вывешваць бел-чырвона-белыя сцягі. На некаторых кадрах СТВ бел-чырвона-белы сцяг замазаны, украінскі сцяг не размывалі.
Вядоўца расцаніў гэта як «псіхалагічны ціск на беларускіх памежнікаў» і «толькі малую частку гібрыднага ўдару Захаду». СТВ наракае на «шум рухавікоў і лязганне гусеніц», палёты беспілотнікаў каля мяжы, з якой (пра што не згадвае СТВ) зімой на ўкраінскую зямлю пайшлі з вайной расейскія войскі.
Алесь Наваборскі belsat.eu