Моладзевая зборная Беларусі не паедзе разам з расейцамі на чэмпіянат свету, які пройдзе з 14 па 26 лістапада ў іспанскім горадзе Ла-Нусія. Яе былі гатовыя прыняць, але Беларуская федэрацыя боксу адмовілася. Так жа зрабіла Федэрацыя боксу Расеі.
Першапачаткова, як і большасць сусветных федэрацыяў, Міжнародная федэрацыя боксу (IBA) не дапускала беларускіх і расейскіх спартоўцаў да спаборніцтваў пад сваёй эгідай. Але 5 кастрычніка рада дырэктараў IBA прагаласавала за адмену папярэдняга рашэння і допуск да спаборніцтваў баксёраў з Расеі і Беларусі.
Ды на гэтых выходных стала вядома, што моладзевы чэмпіянат свету ўсё роўна пройдзе без удзелу баксёраў з Беларусі і Расеі. Гэтую інфармацыю пацвердзіла IBA: асацыяцыя атрымала лісты ад нацыянальных федэрацыяў, адмову ад удзелу тлумачылі праблемамі з часам і лагістыкай пры падрыхтоўцы спартоўцаў.
22 кастрычніка Рада Міжнароднай федэрацыі лыжнага спорту (FIS) таксама падоўжыла адхіленне беларускіх і расейскіх спартоўцаў на сезон 2022/2023.
На мінулым тыдні кіраўнік Міжнароднага Алімпійскага камітэту (IOC) Томас Бах заклікаў па-ранейшаму не дапускаць беларускіх і расейскіх спартоўцаў да міжнародных спаборніцтваў. Ён заявіў, што спартоўцаў нельга караць па палітычных прычынах, але заклікаў міжнародная федэрацыі не пускаць зборныя з гэтых двух краінаў на спаборніцтвы.
Кіраўнік міжнароднага дэпартаменту Беларускага фонду спартовай салідарнасці (BSSF) Анатоль Котаў у сацыяльных сетках арганізацыі пракаментаваў заяву кіраўніка IOC:
«Бах мае рацыю: вайну пачалі не спартоўцы, а адзін дыктатар у Крамлі. Другі ж у Менску яго падтрымаў. Але спорт – гэта пра мір, каштоўнасці. Калі з расейскіх спартоўцаў адзінкі выказаліся супраць вайны, то ў беларускіх больш смелая пазіцыя. Прынамсі, 2020 год, калі быў шэраг выказванняў з крытыкай рэжыму, паказаў, што маўчаць – не варыянт. Маўчыш – у выніку становіцца толькі горш. Пры гэтым нельга сказаць, што спорт і дзяржава ў Беларусі і Расеі – розныя рэчы. Спартоўцы ўбудаваны ў дзяржаўную сістэму. На міжнароднай арэне няма месца атлетам з «Z-поглядамі». Бах нязменна адстойвае пазіцыю, што спартовец – у цэнтры ўсяго. І алімпійскія каштоўнасці павінны прасоўвацца праз міжнародную супольнасць. Але гэта не дастасавальна сёння да Беларусі і Расеі, аб чым прэзідэнт IOC таксама сказаў. Так што я не бачу дваістасці ў ягоных заявах ці нейкіх рэверансаў у бок Беларусі і Расеі».
На сёння высокая імавернасць, што беларускія і расейскія спартоўцы прапусцяць летнія Алімпійскія гульні ў Парыжы ў 2024 годзе.
АС belsat.eu
