Ваеннапалонных Збройных сілаў Украіны ўтрымліваюць у калоніях агульнага рэжыму ў Растоўскай вобласці Расеі. Пра гэта ў Facebook паведаміў украінскі журналіст Раман Цымбалюк.
Паводле яго, для канцэнтрацыі ўкраінскіх палонных рассялілі адразу дзве пенітэнцыярныя ўстановы – калоніі агульнага рэжыму № 1 у горадзе Зверава і № 12 у Каменску-Шахцінскім.
«Як паведамляецца, паўтара месяца таму адтуль выселілі пастаяльцаў. Іх перавезлі ў калонію № 10 Растова-на-Доне, дзе зняволеныя цяпер спяць у тры змены. А ўстановы ў Каменску-Шахцінскім і Звераве цяпер напаўняюцца за кошт захопленых на полі бою ўкраінскіх салдатаў», – расказаў Цымбалюк.
Ён заявіў, што ахоўваюць палонных расейскія турэмшчыкі і частка зняволеных, якіх пакінулі на дапаможных працах.
«Афіцыйнага перапрафілявання турмаў у лагеры для ваеннапалонных – як таго патрабуе міжнародная канвенцыя – не было», – адзначыў журналіст.
Праваабарончы праект Gulagu.net паведаміў, што атрымаў больш за 40 гігабайт відэа, дакументаў і фатаграфіяў катаванняў і згвалтаванняў зняволеных у расейскіх турмах. Некаторыя відэазапісы ўжо апублікаваныя.
Пасля публікацыі трох запісаў здзекаў з вязняў у Саратаўскім сухотным шпіталі была распачатая крымінальная справа. Некалькі кіраўнікоў рэгіянальнага ўпраўлення турэмнага ведамства звольненыя.
ПС belsat.eu