У Беларусі могуць змякчыць цэнавае рэгуляванне. Пра гэта 23 красавіка паведаміў намеснік міністра антыманапольнага рэгулявання і гандлю Андрэй Картун, перадае БелТА.
Пастанова ўраду 23 лютага № 100 прадугледжвае жорсткія захады рэгулявання цэнаў на сацыяльна значныя тавары першай неабходнасці. З 1 сакавіка штомесячнае змяненне цэнаў на іх не павінна перавышаць 0,2 % да цаны на гэтыя тавары на апошні дзень папярэдняга месяца.
«Мы былі вымушаныя рэагаваць. Але для нас важна развязаць яшчэ адну задачу – забяспечыць наяўнасць на паліцах сацыяльна значных тавараў, асабліва імпартаваных. Напрыклад, наконт сланечнікавага алею мы пастанавілі дазволіць рост коштаў у межах 15 %, каб не застацца без гэтага тавару. Цяпер у нас няма праблемаў з запасамі ў гэтай пазіцыі», – падкрэсліў Андрэй Картун.
Цяпер, паводле яго, ва ўрадзе абмяркоўваюць магчымую адмену гэтай пастановы і пераход да больш ліберальных захадаў:
«Думаю, бліжэйшым часам мы агучым канкрэтную дату адмены гэтай пастановы. Будзем шукаць больш кампрамісныя механізмы».
Намеснік міністра мяркуе, што пасля адмены пастановы істотнага росту цэнаў не павінна быць:
«Мы будзем пільна сачыць за гандлем, каб не было злоўжывання. Будзем альбо працаваць у пунктавым рэжыме, альбо будзе пераходны этап: памяняем жорсткае рэгуляванне на больш ліберальнае, напрыклад, у гандлёвых надбаўках».
Нагадаем, што ў спіс Савету Міністраў пра сацыяльна значныя тавары першай неабходнасці, на якія дырэктыўна абмежавалі рост цэнаў, увайшлі 62 тавары і 50 лекаў. Сярод іх малако, хлеб, бульба, смятана, яблыкі, запалкі, рыба, соль, цукар-пясок, запалкі, а таксама аспірын, анальгін, каптапрыл, ксілін і эналапрыл.
МГ belsat.eu
