Федэральная служба бяспекі Расеі заявіла, што тэрарысты, якія ўчынілі напад на «Crocus City Hall», хацелі ўцячы ва Украіну і «мелі адпаведныя кантакты на ўкраінскім баку».
Агенцтва «РИА Новости» распаўсюдзіла заяву ФСБ наконт тэракту ў Падмаскоўі.
Сцвярджаецца, што выніку дзеянняў спецслужбаў і праваахоўных органаў затрыманыя 11 чалавек, у тым ліку чацвёра тэрарыстаў, якія бралі беспасярэдні ўдзел у ажыццяўленні тэракту ў «Crocus City Hall». Цяпер вядзецца далейшая праца над выяўленнем памагатых.
У ФСБ падкрэсліваюць, што пасля ўчынення тэракту злачынцы спрабавалі ўцячы, едучы ў бок расейска-ўкраінскай мяжы. Спецслужба сцвярджае: «пасля здзяйснення тэракту злачынцы мелі намер перайсці расейска-ўкраінскую мяжу, мелі адпаведныя кантакты на ўкраінскім баку».
Паводле дэпутата Дзярждумы Аляксандра Хінштэйна, аўтамабіль з тэрарыстамі спынілі ў раёне вёскі Хацунь Бранскай вобласці. Выданне Astra звяртае ўвагу, што адлегласць ад вёскі да Украіны – прыкладна 153 кіламетры, а да Беларусі – 250 кіламетраў.
У ФСБ падкрэсліваюць, што «тэракт быў старанна спланаваны». Зброя, якая выкарыстоўвалася тэрарыстамі, была прыгатаваная ў схованцы.
У заяве ФСБ нічога не гаворыцца пра грамадзянства або этнічную прыналежнасць падазраваных. Раней шэраг расейскіх медыяў паведамляў, што затрыманыя – грамадзяне Таджыкістану.
Улады Украіны адразу пасля тэракту заявілі, што не маюць дачынення да тэракту. У Галоўным упраўленні разведкі Міністэрства абароны Украіны лічаць, што тэракт у Падмаскоўі ёсць свядомаю правакацыяй рэжыму Пуціна.
Учора расейскі вайсковы аналітык Ян Мацвееў у эфіры «Вось так» выказаў меркаванне, што трагедыю ў «Crocus City Hall» пуцінская ўлада можа выкарыстоўваць для ўвядзення нейкіх непапулярных захадаў, у тым ліку другой хвалі мабілізацыі.
Глеб Нержын belsat.eu
