ГУР Украіны пра тэракт у Падмаскоўі: Гэта свядомая правакацыя спецслужбаў Пуціна
У Галоўным упраўленні разведкі Мінабароны Украіны заявілі, што тэракт у Падмаскоўі з’яўляецца свядомай правакацыяй рэжыму Пуціна, пра які папярэджвала міжнародная супольнасць. Пра гэта сказаў прадстаўнік ГУР Андрэй Юсаў у каментары «Украінскай праўдзе».
«Гэта свядомая правакацыя спецслужбаў Пуціна, пра якую папярэджвала міжнародная супольнасць. Крамлёўскі тыран з гэтага пачынаў сваю карʼеру і такімі ж злачынствамі супраць уласных грамадзян хоча яе завяршыць», – адзначыў прадстаўнік ГУР.
Вечарам 22 сакавіка перад канцэртам гурту «Пікнік» у маскоўскай канцэртнай залі «Крокус Сіці Хол» адбылася масавая страляніна з аўтамата. Пасля раздаліся некалькі выбухаў.
Улады Расеі паведамляюць пра не менш чым 40 загінулых і не менш чым 130 параненых, дакладная колькасць пакуль невядомая. Квіткі на канцэрт былі раскупленыя, у зале маглі знаходзіцца больш за 2 тысячы чалавек.
Варта адзначыць, што яшчэ 8 сакавіка пасольства ЗША ў Расіі і МЗС Брытаніі папярэдзілі аб магчымых тэрактах у Маскве.
Ася Саковіч belsat.eu
