Губернатар Белгародскай вобласці Вячаслаў Гладкоў сцвярджае, што ў выніку атакі ўкраінскіх беспілотнікаў адзін чалавек загінуў і пяцёра паранены.
Паводле Вячаслава Гладкова, у выніку паветранага нападу з боку Украіны ў Белгарадзе ў шматкватэрным доме адбылося абвальванне трох балконаў. У адной з кватэраў у момант атакі знаходзіліся муж і жонка: мужчына загінуў, а жанчына шпіталізаваная з закрытай чэрапна-мазгавой траўмай.
Усяго ў выніку атакі пацярпелі 5 мірных жыхароў. Агулам пашкоджаны 69 кватэраў у 14 шматкватэрных дамах, чатыры прыватныя дамы, 8 аўтамабіляў і пасажырскі аўтобус.
Зазнала напад БПЛА таксама адно з прадпрыемстваў Старааскольскай гарадской акругі, паведаміў Гладкоў.
Як паведамляе «Интерфакс», у Самарскай вобласці беспілотнікі атакавалі Куйбышаўскі нафтаперапрацоўчы завод, там распачаўся пажар. Пацярпелых няма.
Глеб Нержын belsat.eu
