Пытанне аб тым, ці беларускія хакеры атакавалі сайты ўкраінскіх міністэрстваў, робіць сітуацыю яшчэ больш складанай для адказу з боку ЗША.
У ноч на 14 студзеня каля 70 сайтаў органаў улады Украіны перажылі кібератаку, многія сайты перасталі працаваць, на шэрагу старонак быў апублікаваны тэкст з пагрозамі на адрас Украіны. Кіеў западозрыў у атаках хакерскую групоўку «UNC1151», якую назваў звязанай з беларускімі спецслужбамі. Амерыканскае выданне «Politico» расказала, што ў Злучаных Штатах думаюць пра ўдзел Беларусі ў атаках і магчымым адказе на гэта.
Гэткія навіны пра хакераў ставяць перад Штатамі дылему аб тым, як адказаць на кібератакі, калі яны перарастуць у «кібервайну». Выкарыстанне Расеяй трэціх краінаў, як Беларусь, робіць складаным пытанне аб тым, каго вініць і як абгрунтаваць контратаку. Пры тым удзел Беларусі не пацверджаны, а ЗША не тлумачылі, як збіраюцца контратакаваць – а амерыканскія дэпутаты ўжо ціснуць на прэзідэнта, каб быў адказ. Прэзідэнт ЗША Джо Байдэн казаў толькі, што «мы адкажам тым жа шляхам, у кіберпрасторы».
Высокапастаўлены чыноўнік Дзяржаўнага дэпартаменту ЗША ананімна расказаў журналістам, што для Штатаў відавочна: Расея выкарыстоўвае ўразлівасць Аляксандра Лукашэнкі і карыстаецца тым, што ён вінны Расеі за падтрымку, а Беларусь з’яўляецца дэстабілізатарам у рэгіёне.
Афіцыйна ж Дзяржаўны дэпартамент не каментаваў магчымага ўдзелу Беларусі ў кібератаках, а толькі заяўляў, што разам з партнёрамі пільна сочыць за кіберактыўнасцю супраць Украіны і прапануе падтрымку ўкраінскім уладам у расследаванні атакі.
АА belsat.eu