На відэа сілавікоў ён казаў, што залез на флагшток на тэрыторыі пракуратуры, зрэзаў сцягі. Яму прысудзілі год «хіміі».
Жыхар Івацэвічаў Руслан Шыла 21 студзеня выйшаў на волю пасля адбывання пакарання – 1 года абмежавання волі за «Здзек з дзяржаўных сімвалаў», піша берасцейскае аддзяленне праваабарончага цэнтру «Вясна». Увесь тэрмін на «хіміі» ён правёў у асіповіцкай ПУАТ-48.
На відэа сілавікоў ён казаў, што ў ноч з 2 на 3 верасня 2020 года здымаў дзяржаўныя сцягі на тэрыторыі пракуратуры і Следчага камітэту: залез на флагшток на тэрыторыі пракуратуры, спрабаваў зняць сцяг, але не здолеў, і тады зрэзаў, а потым прайшоўся па горадзе, прыйшоў да СК і таксама парэзаў дзяржаўны сцяг і сцяг СК. Праз некалькі гадзінаў яго затрымалі.
Руслан Шыла прызнаў сваю віну на судзе, заявіў аб раскаянні і кампенсаваў шкоду. Але 13 лістапада 2020 года яго асудзілі на 1 год «хіміі», як расказваў «Першы рэгіён». Чаму ён выйшаў на волю праз больш як год, праваабаронцы не паведамляюць.
У Івацэвічах гэта быў не першы выпадак «здзеку з дзяржаўнай сімволікі» – там у 2020 годзе таксама затрымалі падлетка, якога падазравалі ў тым, што ён сарваў сцяг з пошты і спрабаваў спаліць.
Агульная колькасць палітвязняў у Беларусі тым часам не памяншаецца, а толькі расце: пакуль адны выходзяць на волю па адбыванні пакарання або ўцякаюць з «хіміі» за мяжу, іншых кідаюць за краты. На момант публікацыі праваабарончая супольнасць Беларусі прызнала палітычнымі зняволенымі 988 чалавек, працягвае аналізаваць крымінальныя справы на адпаведнасць азначэнню «палітвязень» і не заўсёды паспявае за рэпрэсіўным апаратам.
АА belsat.eu
