У Менскім абласным судзе 22 снежня агучылі прысуд у крымінальнай справе супраць анархістаў Дзмітрыя Дубоўскага, Дзмітрыя Разановіча, Ігара Аліневіча і Сяргея Раманава.
Падсудных прызналі вінаватымі ў незаконных дзеяннях у дачыненні агнявой зброі, боепрыпасаў і выбуховых рэчываў ды яе перамяшчэнні праз мяжу, а таксама ва ўчыненні актаў тэрарызму.
Суддзя Валер Тулейка прызначыў анархістам наступныя тэрміны:
Анархістаў затрымалі 28 кастрычніка мінулага года каля ўкраінскай мяжы. У МУС заявілі, што ў іх знайшлі агнявую зброю, ноўтбукі, GPS-трэкеры, фотакамеры і спецыяльнае экіпаванне.
У Генеральнай пракуратуры пасля затрымання расказалі, што гэтыя «асобы не пазней за 15 кастрычніка аб’ядналіся ў групу і ўступілі ў змову для супольнага здзяйснення актаў тэрарызму, каб уздзейнічаць на прыняцце рашэнняў органамі ўлады і дэстабілізаваць грамадскі парадак». Таксама «групу Аліневіча» падазравалі ў падпале аддзелу ДАІ ў Мазыры ды машынаў ля будынку пракуратуры ў Салігорску.
Ігар Аліневіч упершыню быў затрыманы ў 2010 годзе прадстаўнікамі беларускіх спецслужбаў у Маскве і змешчаны ў СІЗА КДБ у Менску. У траўні 2011 года суд Заводскага раёну Менску пакараў яго 8 гадамі пазбаўлення волі ў калоніі ва ўмовах узмоцненага рэжыму.
Аліневіча абвінавацілі ў зацятым хуліганстве ў эпізодах нападу на расейскую амбасаду, а таксама за ўдзел у акцыі каля Генеральнага штабу Узброеных сілаў Беларусі, нападах на казіно, офіс банку «Масква-Менск» ды ізалятар на завулку Акрэсціна. У 2015 годзе быў вызвалены праз памілаванне і зʼехаў з Беларусі. У 2020-м Ігар Аліневіч вярнуўся ў Беларусь, каб далучыцца да пратэстаў.
АД belsat.eu