Пад Кіевам абстралялі машыну першага памочніка прэзідэнта Украіны. Кіроўца ў рэанімацыі ў цяжкім стане
Раніцай 22 верасня пад Кіевам невядомыя абстралялі машыну першага памочніка прэзідэнта Украіны Сяргея Шэфіра, паведамляе МУС Украіны.
Напад на машыну Шэфіра быў здзейснены на паркоўцы супермаркета «АТБ» на ўездзе ў пасёлак Леснікі.
Па словах крыніц парталу «Страна.UA», здзейснілі стрэлы ў машыну аўтаматнай чаргой з лесу. Усяго на машыне Шэфіра 13 кулявых адтулін.
У выніку абстрэлу пацярпеў вадзіцель першага памочніка прэзідэнта. Ён атрымаў тры кулі і цяпер знаходзіцца ў рэанімацыі ў цяжкім стане. Сам Сяргей Шэфір, на якога быў здзейснены замах, жывы і не ранены, зараз знаходзіцца ў бяспецы.
У Офісе прэзідэнта абяцаюць, што хутка будзе публічная рэакцыя прэзідэнта. Сам жа прэзідэнт Украіны Уладзімір Зяленскі зараз знаходзіцца з рабочай паездкай у ЗША на пасяджэнні Генасамблеі ААН.
АД, belsat.eu
