У складзе палка імя Кастуся Каліноўскага сфармаваны батальён «Ліцвін». Пра гэта паведаміла прэс-сакратарка палка Крысціна Чабор.
«Колькасць беларусаў, якія гатовыя даць адпор расейскай навале, няўхільна расце. На мінулым тыдні на базу прыбыла новая група рэкрутаў, якая ўжо залічаная ў вучэбную роту і пад кіраўніцтвам інструктараў пачала навучанне. У складзе палка Каліноўскага сфармаваны батальён «Ліцвін».
Неўзабаве ваяры батальёну будуць выконваць баявыя задачы на фронце», – паведаміла ў прэс-рэлізе прадстаўніца палка імя Каліноўскага Крысціна з пазыўным Чабор.
Яна нагадала таксама, што нядаўна полк зведаў змены ў сваім складзе: частка батальёну «Тэрор» была адасобленая ад палка з захаваннем назвы.
«Гэтыя перамены не закранулі баяздольнасці і еднасці нашага палка. Кожны баец мае права на свой пункт гледжання ў розных пытаннях, але ў кожнага з нас – адзіная мэта, якая ёсць фундаментам палка: мы вызваляем Беларусь праз вызваленне Украіны», – сказала прэс-сакратарка палка.
Беларускі полк імя Каліноўскага, які ваюе ва Украіне супраць расейскага агрэсара, складаецца цяпер, такім чынам, з двух батальёнаў – «Волат» і «Ліцвін». 19 жніўня стала вядома, што частка батальёну «Тэрор» выйшла са складу палка, не згодная з рашэннем камандавання аб звальненні з ЗСУ камандзіра батальёну з пазыўным Вараг.
Зміцер Міраш belsat.eu