У Чэхіі беларуса асудзілі на 21 год турмы. Ён ваяваў на баку прарасейскіх баевікоў на Данбасе
Грамадзяніна Беларусі спачатку асудзілі на 4,5 года, але апеляцыйная інстанцыя перакваліфікавала справу на «Тэрарызм».
У верасні мінулага году грамадзяніна Беларусі Аляксея Фадзеева асудзілі ў Чэхіі на 4,5 года турмы за «ўдзел у злачыннай групоўцы» ў сувязі з тым, што ён ваяваў на баку прарасейскіх баевікоў на ўкраінскім Данбасе.
Амбасадар Украіны ў Чэхіі Яўген Перабійніс 22 ліпеня паведаміў, што апеляцыйная інстанцыя перакваліфікавала справу на «тэрарызм» і асудзіла Фадзеева на 21 год пазбаўлення волі.
«Працягваецца сістэматычны пераслед баевікоў з боку чэшскіх праваахоўных і судовых органаў, якія з ініцыятывы Расеі сталі на слізкі і злачынны шлях удзелу ў вайне супраць Украіны. Працяг будзе», – напісаў амбасадар.
Паводле звестак чэшскага выдання Novinky.cz, 42-гадовы Фадзееў працяглы час жыў у Празе, некалькі разоў ездзіў ваяваць на баку «ДНР» ў 2014–2016 гадах. Абарона беларуса настойвала, што ён ехаў «дапамагаць людзям бараніцца ад украінскіх фашыстаў», але ўдзельнічаў толькі ў дапаможных работах і не ваяваў на перадавой.
АА belsat.eu
