Толькі на шосты дзень па затрыманні тром зняволеным «свабодаўцам» змаглі аддаць перадачы ў ізалятар на Акрэсціна.
«Радыё Свабода» паведаміла вечарам 22 ліпеня, што да зняволеных супрацоўнікаў выдання нарэшце змаглі трапіць да адвакаты: сёння – да Алега Груздзіловіча і Іны Студзінскай, днём раней – да Алеся Дашчынскага. Але адвакатаў не дапускаюць да справы. У чым вінавацяць журналістаў, невядома.
Таксама сваякі сёння ўпершыню змаглі аддаць перадачы – пяць дзён перадачы не бралі. Але вядома толькі, што перадачу атрымала Студзінская, а ці атрымалі Груздзіловіч і Дашчынскі, невядома.
Адвакатка Груздзіловіча расказала пра свайго кліента:
«Трымаецца ён годна. Спіць на ложку на голым дрэве без матрацаў і бялізны, а пад галаву кладзе бутэльку з вадой».
У тых жа ўмовах Дашчынскі.
Адвакат Студзінскай расказаў, што яна выглядае бадзёра і не губляе настрою. Перадае прывітанне калегам і сваякам, ведае пра падтрымку.
Як і Дашчынскі, і Груздзіловіч, яна спіць на насціле з дрэва, матрацаў і бялізны не выдаюць. Але медычную дапамогу ёй аказваюць.
Высветлілася, што яна не абвяшчала галадоўку, а проста адмаўляецца ад турэмнай ежы, бо яна кепская.
16 ліпеня пасля ператрусаў былі затрыманыя журналісты «Радыё Свабода» Алег Груздзіловіч, Інэса Студзінская і Алесь Дашчынскі, якія шмат гадоў прапрацавалі ў гэтым СМІ, вядомыя па матэрыялах, што асвятляюць найважнейшыя грамадска-палітычныя падзеі ў Беларусі, а таксама журналісты Ганна Галёта і Ігар Ільяш, якія супрацоўнічаюць з «Белсатам», шэраг рэгіянальных журналістаў і фрылансераў.
Да таго пад «зачыстку» сілавікоў трапілі шматлікія няўрадавыя арганізацыі і амаль усе праваабарончыя. Сярод іх – Беларуская асацыяцыя журналістаў, якую ўлады цяпер збіраюцца закрыць афіцыйна.
АА belsat.eu