14 студзеня ў Магілёве вецер знішчыў частку даху гістарычнай катэдры Унебаўзяцця Найсвяцейшай Панны Марыі і святога Станіслава. Святары звярнуліся за дапамогай да беларусаў, каб аднавіць святыню. За тыдзень на рахунак касцёлу паступіла 19 тысячаў 928 рублёў, паведамляе сайт Catholic.by.
У Магілёве будаўнікі амаль завяршылі часовы рамонт даху катэдры Унебаўзяцця Найсвяцейшай Панны Марыі і святога Станіслава. Гістарычны будынак моцна пашкодзіў ураган 14 студзеня.
Біскупскі вікарый усходняга рэгіёна Менска-Магілёўскай архідыяцэзіі біскуп Аляксандр Яшэўскі паведаміў, што цягам тыдня грамадзяне адгукнуліся на зварот святароў дапамагчы аднавіць дах будынку і ахвяравалі 19 тысячаў 928 рублёў.
«На гэтым тыдні мы забяспечылі накрыцце касцёлу на зімовы перыяд, паставіўшы часовыя кроквы, а таксама накрылі разбураную частку даху дсп і руберойдам. Яшчэ раз дзякую парафіі ў Будславе за перададзеныя лісты дсп і экспертам-альпіністам, якія ўвесь тыдзень працавалі на вышыні», – кажа біскуп Аляксандр Яшэўскі.
Але працы яшчэ не завершаныя, неабходны рамонт усяго даху, плошча якога 260 м2. Будаўнікі падлічылі, што для замены даху трэба 77 тысячаў 90 рублёў, а парафія мусіць сабраць 38 тысячаў 545 рублёў.
Рэквізіты для ахвяраванняў: р/с BY64BLBB30150700187012001001 ОАО «Белінвестбанк», БИК BLBBBY2X УНП 700187012
Атрымальнік плацяжу – Рымска-каталіцкі прыход Унебаўзяцця Найсвяцейшай Панны Марыі ў г.Магілёве. Прызначэнне плацяжу – добраахвотнае ахвяраванне.
ВЛ belsat.eu
