Сёлетні жнівень разбурае стэрэатыпы. Апошні месяц лета трывае спёка. Дзякуючы шырокаму антыцыклону, які характарызуецца высокім ціскам, блакуецца прасоўванне атлантычных цыклонаў, якія нясуць у Еўропу прахалоду і дажджы, паведамляе Белгідрамет.
У нядзелю і панядзелак 21–22 жніўня магчымы дождж, месцамі навальніцы. Тэмпература паветра ўначы складзе ад 12 да 19 градусаў цяпла, а днём паветра прагрэецца да 31 градуса.
На працягу тыдня антыцыклон будзе ўзмацняць свой уплыў. У Беларусь прыйдуць паветраныя масы з субтропікаў Азіі, і стане яшчэ гарачэй.
У аўторак, 23 жніўня, сіноптыкі прагназуюць дажджы і навальніцы на захадзе краіны. Уначы чакаецца ад 13 да 19 цяпла, а ўдзень паветра прагрэецца да 27–33 градусаў.
Пры канцы тыдня, 24–26 жніўня, будзе сонечна і без ападкаў. Тэмпература паветра ўначы будзе вагацца ад 13 да 20 са знакам плюс, удзень чакаецца спёка: слупкі тэрмометраў падымуцца да 29–34 градусаў цяпла, у асобных раёнах краіны магчымая спёка нават да +35 .
У выніку тэмпература вады ў рэках і вадаёмах складзе ад 16 да 25 градусаў.
Белгідрамет нагадвае правілы паводзінаў у спякоту:
- удзень зачыняць вокны і адчыняць іх толькі на ноч. Па магчымасці, у гадзіны найбольшага павышэння тэмпературы заставацца ўдома;
- штодня неабходна выпіваць па 1,5–2 літры вады, пазбягаць ужывання алкаголю, а таксама напояў, якія змяшчаюць кафеін і вялікую колькасць цукру;
- насіць галаўныя ўборы і адзенне светлых тонаў, абмежаваць перабыванне на сонцы;
- штодзённы рацыён харчавання варта змяніць на карысць летніх салатаў, мінеральнай вады, сокаў і халодных супоў;
- кіроўцам не рэкамендуецца сядаць за стырно ў санцапёк, калі аўтамабіль не абсталяваны кандыцыянерам.
Алена Аляксандрава belsat.eu
