У прамысловых арганізацыях цяпер можна будзе павялічваць ліміт звышурочных работ і работ у выхадныя дні. Адпаведны ўказ №105 падпісаў Аляксандр Лукашэнка.
Удакладняецца, што дакумент прыняты для таго, каб максімальна задзейнічаць працоўныя рэсурсы «для аператыўнага вырашэння важнейшых стратэгічных задач у вытворчасці».
Даць больш звышурочнай працы наймальнік зможа толькі ў тым выпадку, калі на гэта пагодзіцца прафзвяз і самі працаўнікі.
Дарэчы, калі ў арганізацыі няма прафзвязу, то і дзеянне ўказа на яе не распаўсюджваецца.
Калі ўсе згодныя, рашэнне наймальніка замацоўваецца ў лакальным прававым акце.
Акрамя таго, пра яго трэба паведаміць у Дэпартамент дзяржаўнай інспекцыі працы, на гэта даецца тры дні.
Нагадаем, што з 1 студзеня 2024 года набыў моц абноўлены Працоўны кодэкс (ПК). Змяненні закранулі больш за 80 артыкулаў: некаторыя з іх прывялі дакумент у адпаведнасць з іншымі прававымі актамі, а нешта змянілася па просьбе работнікаў і наймальнікаў.
Ася Саковіч belsat.eu