Літоўская чыгунка атрымала запыт ад трох беларускіх кампаніяў на транспартаванне ўгнаенняў «Беларуськалія». Але гэтыя кантракты спачатку праверыць спецыяльная ўрадавая камісія, якая мусіць вырашыць, ці пагражаюць транзітныя здзелкі з беларускімі кампаніямі нацыянальным інтарэсам.
Як паведамляецца на сайце Літоўскай чыгункі, да іх звярнулася «Беларуская калійная кампанія» (спецыяльны экспарцёр прадукцыі «Беларуськалія»), кампаніі «Белінтэртранс» і «Белкалі-Мігаа». «Беларуская калійная кампанія» просіць заключыць дамову на перавозку ўгнаенняў з 24 студзеня, аргументуючы гэта неабходнасцю выканання сваіх абавязкаў па рэалізацыі ўгнаенняў праз Клайпедскі порт.
У Літоўскай чыгунцы тлумачаць, што ім патрэбныя прававыя падставы, каб адхіліць просьбы кампаніяў і такім чынам спыніць транзіт калійных угнаенняў праз Літву. Таму ЛЧ звярнулася ў спецыяльную камісія, якая павінна вырашыць, ці не пагражае нацыянальным інтарэсам заключэнне кантрактаў з гэтымі беларускімі кампаніямі.
На гэтым тыдні Літоўская чыгунка афіцыйна паведаміла «Беларуськалію» пра рашэнне ўрада Літвы прызнаць заключаную кампаніямі дамову несапраўднай з 1 лютага. Пры гэтым у чыгунцы не выключалі, што могуць паступіць заяўкі з іншых грузавых перавознікаў і фірмаў-пасярэднікаў на транзіт беларускага калію.
Раней кіраўнік Камітэту нацыянальнай бяспекі і абароны Сейму Літвы Лаўрынас Кашчунас распавёў у інтэрвʼю «Белсату», што шанцы абысці забарону на транзіт беларускіх угнаенняў у Літве амаль нулявыя, бо любой кампаніі (у тым ліку прыватнай) прыйдзецца звяртацца спачатку за дазволам у парламенцкую камісію, а ў камісіі лічаць такі транзіт пагрозай нацыянальнай бяспецы.
Кашчунас пацвердзіў, што кіраўнік «Літоўскай чыгункі» страціў сваю пасаду менавіта таму, што кантракт з «Беларуськаліям» не трапіў на разгляд парламенцкай камісіі.
РР belsat.eu