Служба бяспекі Украіны з’яўляецца злачыннай арганізацыяй, якая працуе цалкам пад амерыканскім кантролем, заявіў «РИА Новости» расейскі эканаміст, палітык, акадэмік Расейскай Акадэміі навук Сяргей Глазьеў.
Раней медыі паведамілі, што СБУ распачала ў дачыненні да Глазьева крымінальную справу за публічныя заклікі да развязвання ваеннага канфлікту.
Сяргей Глазьеў. Фота politikus.ruЯк зазначыў Глазьеў, нічога нечаканага ў гэтым рашэнні няма, «таму што СБУ, па сутнасці выконвае такую ж функцыю сёння ва Украіне, як у фашысцкай Нямеччыне выконвала гестапа». «СБУ сёння з’яўляецца злачыннай арганізацыяй, а яе кіраўніцтва — цалкам кантралюецца амерыканскімі спецслужбамі. То бок гэта арганізацыя, якая робіць беззаконне ва Украіне, учыняючы злачынствы супраць народу Украіны», — заявіў Глазьеў.
Паводле ягоных словаў, кіраўніцтва СБУ, «кіруе карнай аперацыяй на паўднёвым усходзе краіны», і гэтыя людзі вінаватыя ў масавых забойствах украінскіх грамадзянаў. «Ні пра якія прававыя метады і прававую культуру казаць не даводзіцца», — сказаў Глазьеў.
Расейскі дзеяч падкрэсліў, што клапаціцца трэба не пра тое, як і супраць каго СБУ распачынае крымінальныя справы, а пра ахвяраў, лік якім ідзе ўжо на тысячы. «Цалкам лагічна было б, абапіраючыся на шматлікія сведчанні грамадзянаў, прылічыць СБУ да тэрарыстычных арганізацыяў», — падсумаваў Глазьеў.
МЯ, belsat.eu, паводле БелаПАН