Праект закону аб забароне імпарту тавараў, краінай паходжання якіх ёсць Беларусь, паступіў у Вярхоўную Раду Украіны 19 лістапада. Аўтар законапраекту называў Лукашэнку забойцам.
Сам тэкст законапраекту не публікавалі – вядомая толькі назва і імя ініцыятара. Няма гарантыі, што менавіта па гэтым праекце будзе галасаванне, але зараз ён пойдзе на разгляд у камітэтах Вярхоўнай Рады. Праект ініцыяваў дэпутат ад партыі ўлады «Слуга народу» Аляксандр Дануца.
Гэты дэпутат раней выступаў у падтрымку беларускага народу, быў адным з ініцыятараў заявы «Пра Акт свабоды Беларусі». 15 верасня 2020 года на паседжанні Вярхоўнай рады ён казаў:
«Сёння ў прэзідэнта Беларусі, якім ён сябе лічыць, у крыві на руках, – казаў Дануца падчас беларускіх пратэстаў-2020. – Сёння прэзідэнт Беларусі Лукашэнка – забойца. Сёння Прэзідэнт Беларусі пасадзіў актывістаў і простых людзей у беларускія турмы. Прэзідэнт Беларусі Лукашэнка сёння б’е жанчын на маршах герояў. Сёння ні адзін украінец, ні адзін адэкватны чалавек, які выступае супраць гвалту, не можа стаяць убаку».
Паводле Нацыяльнага статыстычнага камітэту Беларусі, за студзень-верасень экспарт тавараў ва Украіну склаў $ 3,57 млрд, імпарт з Украіны ў Беларусь – усяго $ 1 млрд.
Як адзначае Reform.by, Украіна – адзін з найбуйнейшых пакупнікоў беларускіх нафтапрадуктаў, змяшаных мінеральных угнаенняў, застаецца важным рынкам для МАЗу і МТЗ. У апошнія гады Украіна ўводзіла розныя антыдэмпінгавыя мыты, але мыты супраць беларускіх аўтобусаў і грузавікоў скасавалі пасля аспрэчвання беларускім бокам.
«Еўрарадыё» дадае, што ў мінулым годзе ва Украіну пайшло 37,5 % фізічнага экспарту нафтапрадуктаў або 45,2 % у вартасным выражэнні. За 8 месяцаў бягучага году пастаўкі беларускіх нафтапрадуктаў ва Украіну выраслі на 87,7 %, і пастаўкі ідуць з падсанкцыйнага «Нафтану».
АА belsat.eu