Журналісты ў «тэрарыстычным» спісе і прысуды за каментары. Хроніка рэпрэсіяў за 20 кастрычніка
Штодня пасля выбараў 2020 году ў Беларусі працягваюцца рэпрэсіі супраць грамадзянаў. «Белсат» сабраў асноўныя звесткі і факты палітычнага пераследу, пра якія стала вядома 20 кастрычніка.
Камітэт дзяржаўнай бяспекі абнавіў спіс «асоб, якія маюць дачыненне да тэрарыстычнай дзейнасці» – там з’явіліся прозвішчы яшчэ шасці чалавек. Цяпер у ім 934 чалавекі, з іх – 189 беларусы. Сярод іх палітзняволеныя супрацоўніцы «Tut.by» Марына Золатава і Людміла Чэкіна. Акрамя іх, у спіс дадалі былога студэнта Канстанціна Рудніцкага, арганізатара турпаходаў Ігара Галушка, былога выкладчыка радыётэхнічнага каледжа Цімафея Шкуратовіча і «рэйкавага партызана» Віталя Мельніка, якому пры затрыманні прастрэлілі калені.
За размову з палітзняволеным блогерам Паўлам Спірыным у калоніі вязняў адпраўляюць у ШІЗА, ім «забаронена» размаўляць з ім. Павел у калоніі працуе мыйшчыкам посуду. Палітвязня асудзілі на 4,5 гады калоніі агульнага рэжыму за «распальванне сацыяльнай варожасці» за два відэа на Youtube.
У бабруйскай калоніі 20 кастрычніка пачаўся разгляд крымінальнай справы супраць 50-гадовага палітзняволенага Аляксандра Зайкоўскага, асуджанага да двух гадоў калоніі за «гвалт у дачыненні да супрацоўнікаў міліцыі». Цяпер яго судзяць па ч. 1 арт. 411 КК («Злоснае непадпарадкаванне патрабаванням адміністрацыі папраўчай установы»). Справу разглядае суддзя Васіль Галкоўскі. Гэта ўжо трынаццаты палітвязень за апошні год, якога судзяць паводле арт. 411 КК.
У Берасцейскім абласным судзе па «справе Зельцара» асудзілі 34-гадовага палітзняволенага Яўгена Тазава паводле арт. 369 КК («Абраза прадстаўніка ўлады») і ч. 1 арт. 130 КК («Распальванне іншай сацыяльнай варожасці») за негатыўны каментар пра сілавікоў у тэлеграм-канале. Яму прызначылі два з паловай гады калоніі ва ўмовах агульнага рэжыму.
У Менску ў другой палове дня 19 кастрычніка супрацоўнікі міліцыі затрымалі фатографа і журналіста Руслана Мазаніка. Папярэдне вядома, што яго даставілі ў РУУС Заводскага раёну Менску. Сваякам паведамілі, што журналіста затрымалі за нейкі рэпост у сацыяльных сетках. Руслана Мазаніка затрымлівалі і раней, у 2021 годзе, і прысудзілі 13 содняў арышту.
Таксама ўчора, увечары 19 кастрычніка, былі затрыманыя пчаляр Міхаіл Волчак і яго жонка Святлана, былая выкладчыца і кіраўніца страйкаму БДУ. Яе з мужам неаднаразова затрымлівалі пасля 2020 году. Вядома, што пасля ператрусу на вуліцы засталіся іх кот з сабакам.
У Мазыры за абразу Лукашэнкі затрымалі юнака 2001 года нараджэння. Верагодна, яго завуць Сяргей Гулін. На «пакаяным відэа» хлопец кажа, што пісаў абразы ў бок супрацоўнікаў міліцыі і Лукашэнкі, а таксама заклікаў перакрыць мост у Мазыры «для гісторыі».
ГУБАЗіК затрымаў жыхарку Магілёва Аксану Юр’яву. На «пакаяным відэа» жанчына кажа, што з пачатку вайны падтрымлівала Украіну і актыўна пісала каментары на гэтую тэму. У адным з іх яна нібыта абразіла Лукашэнку. Пасля затрымання сілавікі «захапілі» акаўнты жанчыны ў сацсетках.
Менскі абласны суд працягвае разгляд справы «Атрада грамадзянскай самаабароны Беларусі», якую ў Беларусі прызналі тэрарыстычнай арганізацыяй. Па справе праходзяць адразу пяць чалавек – Дзмітрый Сасноўскі, Аляксей Глотаў, Наталля Мацвеева, Вадзім Гулевіч, Кірыл Ашурак. Сёння абвінавачванне зачыталі ўсім фігурантам справы. Усе, акрамя 32-гадовага жыхара Ліды Дзмітрыя Сасноўскага, прызналі віну цалкам або часткова. Згодна версіі абвінавачвання, Сасноўскі «распачаў наўмысныя дзеянні, накіраваныя на падрыхтоўку да акту тэрарызму ў дачыненні да прапагандыста Рыгора Азаронка». Далей суд перайшоў да допыту абвінавачаных.
Адміністрацыя наваполацкай калоніі цісне на палітвязня Аляксандра Целяшмана – яго доўгі тэрмін трымаюць у ШІЗА. У ПК-1 ён быў накіраваны ў студзені. За гэты час яго тройчы змяшчалі ў штрафны ізалятар. Апошні раз яго змясцілі туды 16 жніўня. Ён правёў там 40 содняў, а пасля выхаду адтуль хлопца перавялі ў іншы атрад, дзе зноў змясцілі ў штрафны ізалятар. На гэты раз – на 20 содняў. Аляксандра абвінавацілі ва ўдзеле ў «масавых беспарадках» у Берасці 9-10 жніўня 2020 года і прызначылі 4 гады і 6 месяцаў калоніі агульнага рэжыму.
Алена Рувіна belsat.eu
