«Белсат» падводзіць вынікі 20 ліпеня – 346-га дня пратэстаў.
Паводле лекараў цэнтральнай больніцы Ліды, сімптомы дэльта-штаму каронавіруса адрозніваюцца ад тых, што ўжо вядомыя і маюць падвышаную заразнасць. Хворыя часцей пакутваюць ад страўнікава-кішачных сімптомаў, а парушэнні нюху і смаку назіраюцца ў меншай колькасці тых, хто захварэў.
Статус палітвязня атрымалі Таццяна Кузіна, Валерыя Касцюгава, Алег Груздзіловіч, Інэса Студзінская, Алесь Дашчынскі, Ганна Галёта і Ігар Ільяш.
Міністр замежных спраў Літвы Габрыелюс Ландсбергіс назваў заявы Лукашэнкі пра «дапамогу» у барацьбе з нелегальнымі мігрантамі шантажом.
«Гэта не дапамога, гэта шантаж. Ад тэрарыстычнага рэжыму на іншае і не разлічваем. Адказ просты – калі Менск не спыніцца і працягне дастаўляць мігрантаў, Літва прапануе новыя санкцыі », – перадала словы міністра ягоная прэс-сакратарка Вітаўце Шмайжыце, паведамляе DELFI.
У Беларусі затрыманыя гісторык і навуковец Андрусь Мастыка і ягоная жонка Таццяна Мастыка, якая ў мінулым узначальвала грамадскае аб’яднанне «Гісторыка».
Раніцай 20 ліпеня адбыўся ператрус па адрасе, дзе прапісаны старшыня руху «За Свабоду» Юрась Губарэвіч. Паводле палітыка, пяцёра невядомых звезлі з сабой ягоную былую жонку Стасю Губарэвіч, якую пазней аштрафавалі на 70 базавых — за сцяг, знойдзены пры вобшуку і адпусцілі. Сілавікі сказалі, што заўтра прыйдуць апісваць маёмасць — па якой справе, невядома.
Палітычная дзяячка Святлана Ціханоўская пагутарыла з прадстаўнікамі CNN, «Голасу Амерыкі», «The Wall Street Journal» і іншымі.
Яна распавяла пра беларускую праблему, заявіла пра жаданне выйсці з крызісу. Прагучалі пытанні пра санкцыі, супрацу з Кітаем, «Паўночную плынь – 2», супрацу з Расеяй. Беларуская тэма – у цэнтры ўвагі перад сустрэчай у Белым доме а 12-й гадзіне мясцовага часу.
Таксама Святлана Ціханоўская ў Белым доме правяла перамовы з дарадцам Байдэна па нацыянальнай бяспецы Джэйкам Салліванам.
На перамовах таксама прысутнічалі кіраўнік дэпартамента Усходняй Еўропы Нацыянальнага савету бяспекі ЗША Крыс Сміт, кіраўнік Савету па гендэрнай палітыцы Белага дому Джэніфер Кляйн і амбасадар ЗША ў Беларусі Джулі Фішэр. Ціханоўская распавяла пра масавыя рэпрэсіі ў дачыненні да журналістаў і актывістаў, пра жудасныя ўмовы ўтрымання ў турмах.
МГМ, belsat.eu