Амаль усе затрыманыя ў «справе траўматолагаў» скампенсавалі «шкоду», – паведамляе «Наша Ніва». Частку затрыманых сёння вызвалілі і адразу адправілі на працу. Хірургаў адпраўляюць працаваць у прыёмныя пакоі. Пакуль вядома як мінімум пра 5 чалавек, але выпушчаных можа быць больш.
Дактароў накіроўваюць працаваць у прыёмныя аддзяленні, дзе надаецца дапамога пры адкрытых пашкоджаннях ці «простых» пераломах, якія не патрабуюць глыбокага абследавання перад аперацыяй.
Але найчасцей дактары там надаюць толькі амбулаторную дапамогу і перанакіроўваюць пацыентаў у аддзяленне.
«Напрыклад, адзін з выпушчаных, Мікалай Жыгар, – вельмі дасведчаны ў пратэзаванні, 80 % ягоных аперацыяў – артапедычныя і не звязаныя з траўмамі. Гэта як ноўтбукам забіваць цвікі», – каментуе дэталі абазнаны суразмоўца.
Нагадаем, пры канцы сакавіка па краіне прайшлі масавыя арышты артапедаў-траўматолагаў. Справа пачалася з затрымання прадстаўнікоў адной з кампаніяў, якая пастаўляла пратэзы замежнай вытворчасці. У віну медыкам ставіцца тое, што яны бралі хабары, калі пацыент купляў пратэзы гэтага пастаўляльніка.
ЗХ belsat.eu