Шольц зноў звярнуўся да Уладзіміра Пуціна. Канцлер Нямеччыны папрасіў спыніць вайну
Канцлер Нямеччыны Оляф Шольц звярнуўся да Уладзіміра Пуціна з заклікам спыніць абстрэл украінскіх гарадоў. Пра гэта паведаміў Шольц па выніках відэанарады з удзелам лідараў заходніх краінаў, перадае Голос Америки. Акрамя Шольца, у відэаканферэнцыі ўзялі ўдзел прэзідэнты ЗША, Польшчы, Францыі, Румыніі, прэм’ер-міністры Брытаніі, Японіі ды Італіі, а таксама іншыя афіцыйныя асобы, у тым ліку лідары Еўразвязу.
Канцлер адзначыў, што краіны NATO і партнёры прыйшлі да пагаднення, што яны не павінны дапусціць перамогі расейскага войска ва Украіне:
«Разам з нашымі партнёрамі ў ЕЗ і NATO мы цалкам адзіныя ў меркаванні, што Расея не павінна выйграць гэтай вайны».
Шольц паведаміў, што наўпрост звярнуўся да прэзідэнта РФ Уладзіміра Пуціна са словамі:
«Спыніце абстрэл украінскіх гарадоў. Дазвольце ўсталяваць неадкладнае перамірʼе і адвядзіце сваіх салдатаў. Спыніце гэтую жудасную вайну».
Шольц таксама назваў дзеянні РФ ва Украіне «бессэнсоўнаю вайной» і «абуральным парушэннем міжнароднага права».
Таксама нагадаем, што Уладзімір Зяленскі днямі адмовіўся прымаць федэральнага прэзідэнта Нямеччыны Франка-Вальтэра Штайнмаера ў Кіеве за наяўнасць прарасейскай пазіцыі ды нежаданне адмовіцца ад расейскага газу і нафты.
ЗХ belsat.eu
