Неўзабаве ў Беларусі пачнуць разліваць сваю вакцыну ад COVID-19. Пра гэта заявіў Аляксандр Лукашэнка на сустрэчы з працаўнікамі гаспадаркі «Жураўлінае» і жыхарамі Пружанскага раёну, піша БелТА.
Дакладныя даты разліву беларускай вакцыны ад каронавіруснай інфекцыі невядомыя. Зімой бягучага года паведамлялася, што ўжо ідуць даклінічныя выпрабаванні прэпарату, а ўвесці яго ў эксплуатацыю планавалася ў 2023 годзе. На базе «БелВітУніфарм» ладзяць вытворчасць вакцыны.
«Але яшчэ раз кажу: залішне не парцеся, – сказаў Лукашэнка. – Калі вядзеш нармальны лад жыцця, табе не трэба баяцца хваробаў. Таму трэба ўпірацца, трэба працаваць. Хто хоча жыць, той сочыць за сваім здароўем».
З верасня беларускія медыкі чакаюць пад’ёму захворвальнасці на COVID-19. У Менску ў гандлёвых цэнтрах і іншых месцах адкрываюцца дадатковыя пункты вакцынацыі. Прышчапіцца ад каронавіруснай інфекцыі ў Беларусі дагэтуль можна толькі расейскімі вакцынамі «Спутнік V», «Спутнік Лайт» ці кітайскімі, паведамляла галоўная адмыслоўца аддзелу першаснай медычнай дапамогі камітэту аховы здароўя Менгарвыканкаму Ірына Талкачова.
Марыя Міхалевіч belsat.eu